24.02.2026 | 23:39
Հայաստանի մի շարք հասցեներում էլեկտրաէներգիայի անջատումներ կլինեն
ՀՀԿ-ում քննարկում չի եղել, ՀՅԴ-ն քննարկել է, բայց որոշում չունի․ քաղաքական ո՞ր ուժերը կմասնակցեն ավագանու արտահերթ ընտրություններին
Քաղաքականություն
17.07.2018 | 15:26
Քանի որ Երևանի ավագանին քաղաքապետ չընտրեց, Կառավարությունը պետք է լուծարի ավագանին և տեղի ունենան արտահերթ ընտրություններ։ «Արտահերթ ընտրությունների մասնակցել-չմասնակցելու հարցը ՀՀԿ-ում չեն քննարկել»,- այս մասին Factor.am-ին ասաց ՀՀԿ կազմակերպչական հանձնաժողովի նախագահ Ռուբեն Թադևոսյանը։
Ըստ մամուլի հրապարակումների չի բացառվում, որ ՀՀԿ-ն ընտրություններին չմասնակցի։ Մինչդեռ ՀՅԴ-ում քննարկել են, բայց վերջնական որոշում չունեն: «Այս պահին որոշում չունենք, քանի որ նոր իրավիճակ է առաջացել և Հայաստանի գերագույն մարմինը դեռ քննարկումների մեջ է, երբ որոշում լինի, բնականաբար, մամուլին ևս կտեղեկացնենք»,- ասաց ՀՅԴ Բյուրոյի հանրային կապերի գրասենյակի ղեկավար Արտակ Սարգսյանը։
Որոշում ունի «Ծառուկյան» դաշինքը, հայտարարել են, որ ավագանու արտահերթ ընտրություններին կմասնակցեն։ Չի բացառվում, որ քաղաքապետի թեկնածու առաջադրեն Նաիրա Զոհրաբյանին։
«Ելք»-ը ևս կմասնակցի ավագանու ընտրություններին, իսկ քաղաքապետի թեկնածուի շրջանառվող անուններն այս պահին դեռ երեքն են՝ Հայկ Մարության, Արարատ Միրզոյան և Ալեն Սիմոնյան։
«Ժառանգություն» կուսակցությունը ևս կմասնակցի ավագանու առաջիկա ընտրություններին, թեև դեռ քաղաքապետի թեկնածուի մասին հայտարարություն չկա, բայց ընտրությունը թերևս կայանա Արմեն Մարտիրոսյանի, Րաֆֆի Հովհաննիսյանի և Հովսեփ Խուրշուդյանի միջև։
«Հիմնադիր խորհրդարանը» պատրաստվում է իր մասնակցությունն ունենալ ավագանու ընտրություններին, քաղաքապետի թեկնածու դժվար թե առաջադրեն։ Այսօր Կարո Եղնուկյանը Factor.am-ին ասել էր, որ դրան դեռ պատրաստ չեն։
Լիլիթ Շաբոյան
