Ադրբեջանի ԱԳՆ-ն Արցախի նախագահի ընտրությունն անվանել է «ծայրահեղ սադրիչ քայլ»

Ադրբեջանի ԱԳ նախարարությունում երկրում հավատարմագրված դիվանագիտական ​​կորպուսի համար տեղի է ունեցել ճեպազրույց՝ ԱԳ նախարար Ջեյհուն Բայրամովի, Ադրբեջանի նախագահ Իլհամ Ալիևի օգտնական Հիքմեթ Հաջիևի և նախագահի հատուկ հանձնարարություններով ներկայացուցիչ Էլչին Ամիրբեկովի մասնակցությամբ։

Ճեպազրույցի ընթացքում, մասնավորապես, նշվել է, որ Արցախի խորհրդարանում վաղը կայանալիք նախագահի ընտրությունները  «սադրանք են»։

«Այդ  անօրինական կազմակերպության «նախագահի» ծրագրված «ընտրությունները» ծայրահեղ սադրիչ քայլ են։ Ադրբեջանի ինքնիշխանության և տարածքային ամբողջականության նման բացահայտ խախտումն անընդունելի է։ Հայաստանի կողմից իրականացված նշված սադրանքները բացասաբար են անդրադառնում կարգավորման գործընթացի վրա և զրոյացնում են միջազգային դերակատարների ջանքերն այս ուղղությամբ։ Անհրաժեշտ է համարժեք հասկանալ Հայաստանի անպատասխանատու և ապակառուցողական պահվածքից բխող ռիսկերն ու սպառնալիքները և ձեռնարկել համապատասխան միջոցներ»,- ասվել է ճեպազրույցում։

Բացի այդ, զորվարժություններ անցկացնող, Հայաստանի սահմանին զորքեր կուտակող և ամեն օր ՀՀ-ին սպառնացող Բաքուն Երևանին մեղադրել է, իբր, ռազմական սադրանք կազմակերպելու մեջ՝ հայտարարելով, թե Հայաստանը «բացահայտորեն նոր խրամատներ է փորում, ամրություններ կառուցում, կադրեր ու տեխնիկա է հավաքում»։

Ադրբեջանցի պաշտոնյաները նշել են նաև, թե Հայաստանը, «օգտագործելով բոլոր հնարավորությունները՝ չարաշահելով առանձին պետությունների և միջազգային կազմակերպությունները, համաշխարհային զրպարտչական արշավ է մղում Ադրբեջանի դեմ տարածաշրջանում իբր շրջափակման և մարդասիրական ճգնաժամի առկայության մասին կեղծ և անհիմն պնդումներով»։

Էմմա Չոբանյան