Ռուսաստանը Բելառուսից գրեթե ամբողջ զորախումբը դուրս է բերել

Բելառուսում մնում է շուրջ 2,100 ռուս զինվորական, իսկ տարածաշրջանային զորքերի խմբավորման ամբողջ ավիացիան դուրս է բերվել երկրից։ Այս մասին հայտնում է «Բելառուսկի գայուն» մոնիթորինգային խումբը՝ մեկնաբանելով երկրից ռուս զինվորականների դուրսբերումը։ Այս գործընթացն ավարտվել է օգոստոսի 5-ին, հայտնում է խմբի Telegram ալիքը։

Բելառուսի Մաչուլիշչի օդանավակայանից դուրս է բերվել ՌԴ օդատիեզերական ուժերի 11 ուղղաթիռ (4 Մի-8 և 7 Մի-24): Բարանովիչի օդանավակայանից Ռուսաստան են մեկնել 9 կործանիչներ, այդ թվում՝ Սու-34 և Սու-30СМ, փոխանցում է The Moscow Times-ը։

Ինքնաթիռների և ուղղաթիռների մեծ մասը Բելառուսում է 2023 թվականի հունվարի սկզբից, իսկ ավիացիոն խմբի դուրսբերումը նշանակում է, որ տարածաշրջանային ուժերի ավիացիոն բաղադրիչն այլևս գոյություն չունի։ Մինչև սեպտեմբերի 1-ը Բելառուսում մնացել էր Ռուսաստանի օդատիեզերական ուժերի միայն մեկ Սու-25 գրոհային ինքնաթիռ, որն օգոստոսի 31-ին տեղափոխվել էր «Լիդա» օդանավակայան։

Հաղորդվում է նաև, որ հուլիս-օգոստոս ամիսներին Բելառուսում ռուս զինվորականների թվի զգալի կրճատում է գրանցվել։ Ռուսական դաշտային ճամբարները Օբուզ-Լեսնովսկի, Լեպելսկի և Օսիպովիչսկի զորավարժարաններում լուծարվել են, իսկ այնտեղ տեղակայված զինվորականները վերադարձել են Ռուսաստան։

Սակայն, ըստ մոնիթորինգային խմբի, ռուսական զորքերի փոքր կոնտինգենտը մնացել է Բելառուսի որոշ վայրերում, այդ թվում՝ Մոզիր (հայտնի է նաև որպես Բոկով) և Զյաբրովկա օդանավակայաններում, ինչպես նաև Բարանովիչի ռադիոտեխնիկական կենտրոնում և 43-րդ կապի Վիլեյկա կենտրոնում։