Քաղաքականություն
08.09.2023 | 17:17
Ադրբեջանի նախագահ Իլհամ Ալիևի օգնական Հիքմեթ Հաջիևն արձագանքել է ՀՀ վարչապետ Նիկոլ Փաշինյանի հայտարարություններին, որ Բաքուն սրում է ռազմաքաղաքական իրավիճակն ու զորքեր է կուտակում սահմանին։ Մասնավորապես, Հաջիևը Reuters-ին ասել է, որ Ադրբեջանի զինված ուժերը նախապես ծրագրված զորավարժություններ են անցկացնում՝ աշնանն ու ձմռանը նախապատրաստության շրջանակում։
«Դա կանոնավոր պլանավորման գործընթացի մի մասն է»,- ասել է Հաջիևը՝ իր հերթին Հայաստանին անհիմն մեղադրել սահմանին զորքեր կենտրոնացնելու և նոր սպառազինության համակարգեր ձեռք բերելու մեջ։
Նա նշել է, որ, իբր, «Լեռնային Ղարաբաղի ներսում գտնվող էթնիկ հայկական ուժերը նույնպես դուրս են եկել կանոնավոր զորանոցներից և տեղակայվել են առաջնագծի դիրքերում»։
«Մեր ռազմավարությունն ուղղված է Ադրբեջանի դեմ ցանկացած զինված կամ անօրինական ռազմական գործողությունները կամ սադրանքները զսպելուն»,- ասել է Հաջիևը։
Իր հայտարարությամբ, փաստորեն, Հաջիևը հակասել է Ադրբեջանի ԱԳՆ-ին, որը զորքերի կուտակման մասին հայկական կողմի հայտարարությունն անվանել էր «մանիպուլյացիա»։
«Սեպտեմբերի 7-ին Կառավարության նիստում Ադրբեջանի հասցեին Հայաստանի վարչապետ Նիկոլ Փաշինյանի հնչեցրած մեղադրանքները՝ տարածաշրջանում ռազմաքաղաքական իրավիճակի սրման, Ադրբեջանի տարածքում ուժերի կենտրոնացման մասին, Հայաստանի կողմից հերթական քաղաքական մանիպուլյացիայի անբաժանելի մասն են»,-հայտարարել էր Ադրբեջանի ԱԳՆ-ն։
Հիշեցնենք, որ Նիկոլ Փաշինյանը նախօրեին անդրադարձել էր տարածաշրջանում ռազմաքաղաքական իրավիճակին, ադրբեջանական զինուժի կուտակումներին և սադրանքներին, ինչպես նաև Ադրբեջանի կողմից Լաչինի միջանցքի ապօրինի արգելափակմանը:
«Նախորդ շաբաթվա ընթացքում ռազմաքաղաքական իրավիճակը մեր տարածաշրջանում էականորեն սրվել է: Պատճառն այն է, որ Ադրբեջանն օրեր շարունակ զորքեր է կուտակում Լեռնային Ղարաբաղի շփման գծի և Հայաստան-Ադրբեջան սահմանագծի երկայնքով: Ադրբեջանական մամուլում և քարոզչական հարթակներում ավելի է ահագնացել հակահայկական ատելության հռետորաբանությունը: Հայաստանի ինքնիշխան տարածքի նկատմամբ ոտնձգությունների քաղաքականությունը շարունակվում է»,- հայտարարել էր Փաշինյանը։
Էմմա Չոբանյան
