16.03.2026 | 23:18
ԵՄ-ն պատժամիջոցներ է սահմանել չինական և իրանական ընկերությունների նկատմամբ՝ կիբերհարձակումների համար
Բայրամովն ու Խովաևը քննարկել են տարածաշրջանում իրավիճակը
Քաղաքականություն
08.09.2023 | 12:17
ԵԱՀԿ Մինսկի խմբի ռուսաստանցի համանախագահ, Հայաստանի և Ադրբեջանի միջև հարաբերությունների կարգավորմանն աջակցության հարցերով ՌԴ ԱԳ նախարարի հատուկ ներկայացուցիչ Իգոր Խովաևը Բաքվում բանակցություններ է անցկացրել Ադրբեջանի ԱԳ նախարար Ջեյհուն Բայրամովի հետ։
Բաքվի ԱԳՆ հաղորդագրության համաձայն՝ հանդիպման ընթացքում կողմերը քննարկել են տարածաշրջանում առկա իրավիճակը, ինչպես նաև Ադրբեջանի և Հայաստանի միջև խաղաղության գործընթացը։ Բայրամովը կրկին ադրբեջանական քարոզչական թեզերն է հնչեցրել՝ հայտարարելով, թե «Ադրբեջանի տարածքային ամբողջականության և ինքնիշխանության դեմ ուղղված Հայաստանի հայտարարությունները, հռետորաբանությունը և սադրանքները վնասում են տարածաշրջանում կայուն խաղաղության հաստատմանն ուղղված ջանքերին և նախաձեռնություններին»։
Նա նշել է, թե արցախցիների կողմից Աղդամի ճանապարհից օգտագործելուց հրաժարվելը, «տարածաշրջանում լարված հումանիտար իրավիճակի և շրջափակման մասին Հայաստանի անհիմն հայտարարությունների ֆոնին, կրում է քաղաքական, ոչ թե մարդասիրական բնույթ»։
Հիշեցնենք, որ օրերս Խովաևին ընդունել էր Ադրբեջանի նախագահ Իլհամ Ալիևը։ Ավելի վաղ նա հանդիպումներ էր անցկացրել նաև Երևանում։
Էմմա Չոբանյան
