Թուրքիան վերահաստատել է Ուկրաինայում հրադադարի հարցում միջնորդելու պատրաստակամությունը

Թուրքիայի իշխանությունները վերահաստատել են իրենց պատրաստակամությունը՝ ակտիվ և նպաստող դեր խաղալ Ուկրաինայում հրադադարի ապահովման գործում։ Այս մասին լրագրողներին հայտնել են Թուրքիայի Ազգային պաշտպանության նախարարությունից։

«Մենք ուշադիր հետևում ենք Ռուսաստանի և Ուկրաինայի միջև տեղի ունեցող իրադարձություններին, որոնք լուրջ վտանգ են ներկայացնում մեր տարածաշրջանի և ամբողջ աշխարհի անվտանգության համար։ Մենք վերահաստատում ենք մեր պատրաստակամությունը՝ ակտիվ և նպաստող դեր խաղալ հրադադարի հաստատման, այնուհետև տևական խաղաղության ապահովման գործում, ինչպես նաև հնարավոր աջակցություն ցուցաբերել՝ հումանիտար ճգնաժամը մեղմելու համար», – գերատեսչության հայտարարությունն է մեջբերում Hürriyet-ը։

Նախարարությունը հիշեցրել է, որ Թուրքիան շարունակում է շփումները Ռուսաստանի, Ուկրաինայի և ՄԱԿ-ի հետ՝ հացահատիկային գործարքը երկարաձգելու նպատակով։

«Մենք հուսով ենք, որ սեպտեմբերի 4-ին Սոչիում (Թուրքիայի և Ռուսաստանի նախագահներ Թայիփ Էրդողանի և Վլադիմիր Պուտինի) հանդիպումից հետո դրական քայլեր կձեռնարկվեն՝ շարունակելու այս նախաձեռնությունը, որը մեծ ներդրում է ունեցել պարենային ապրանքների համաշխարհային գների կայունացման գործում և ապացուցել, որ բոլոր ճգնաժամերը կարող են լուծվել բարի կամքի և երկխոսության միջոցով»,- ասված է հայտարարության մեջ։

Գործարքի իրականացումը, որը ենթադրում է ուկրաինական հացահատիկի արտահանում սևծովյան նավահանգիստներից և ռուսական գյուղմթերքի և պարարտանյութերի արտահանման նորմալացում համաշխարհային շուկաներ, դադարեցվել է հուլիսի 17-ին՝ Ռուսաստանին վերաբերող դրույթների չկատարման պատճառով։