26.06.2026 | 23:30
Հունիսի 29-ին Հայաստանի մի շարք հասցեներում էլեկտրաէներգիայի անջատումներ կլինեն
Բաքուն արձագանքել է Ադրբեջանի կողմից տարածաշրջանում ռազմաքաղաքական իրավիճակը սրելու մասին Փաշինյանի հայտարարություններին
Քաղաքականություն
07.09.2023 | 16:06
Պաշտոնական Բաքուն կրկին մեկաբանել է ՀՀ վարչապետ Նիկոլ Փաշինյանի փաստագրումները տարածաշրջանում Ադրբեջանի սադիրչ քաղաքականության վերաբերյալ։
«Սեպտեմբերի 7-ին Կառավարության նիստում Ադրբեջանի հասցեին Հայաստանի վարչապետ Նիկոլ Փաշինյանի հնչեցրած մեղադրանքները՝ տարածաշրջանում ռազմաքաղաքական իրավիճակի սրման, Ադրբեջանի տարածքում ուժերի կենտրոնացման մասին, Հայաստանի կողմից հերթական քաղաքական մանիպուլյացիայի անբաժանելի մասն են»,- ասվում է Ադրբեջանի ԱԳՆ հայտարարության մեջ։
Բաքուն կրկին անհիմն մեղադրել է Հայաստանին՝ նշելով, թե տարածաշրջանի անվտանգության իրական սպառնալիքը, իբր, «Հայաստանի ռազմաքաղաքական սադրանքներն են, Հայաստանի տարածքային պահանջներն Ադրբեջանին և հայկական զինված ուժերը, որոնք դուրս չեն բերվել Ադրբեջանի տարածքից»։
«Տարածաշրջանում խաղաղություն և անվտանգություն հաստատելու համար հայկական կողմը պետք է հրաժարվի Ադրբեջանի նկատմամբ տարածքային պահանջներից, վերջ տա ռազմաքաղաքական սադրանքներին, դադարեցնի խոչընդոտներ ստեղծել խաղաղության պայմանագրի բանակցային գործընթացի հաջող ավարտի ճանապարհին»,- ասվում է հայտարարության մեջ։
Հավելենք, որ Փաշինյանն անդրադարձել էր տարածաշրջանում ռազմաքաղաքական իրավիճակին, ադրբեջանական զինուժի կուտակումներին և սադրանքներին, ինչպես նաև Ադրբեջանի կողմից Լաչինի միջանցքի ապօրինի արգելափակմանը:
«Նախորդ շաբաթվա ընթացքում ռազմաքաղաքական իրավիճակը մեր տարածաշրջանում էականորեն սրվել է: Պատճառն այն է, որ Ադրբեջանն օրեր շարունակ զորքեր է կուտակում Լեռնային Ղարաբաղի շփման գծի և Հայաստան-Ադրբեջան սահմանագծի երկայնքով: Ադրբեջանական մամուլում և քարոզչական հարթակներում ավելի է ահագնացել հակահայկական ատելության հռետորաբանությունը: Հայաստանի ինքնիշխան տարածքի նկատմամբ ոտնձգությունների քաղաքականությունը շարունակվում է»,- հայտարարել է Փաշինյանը։
Էմմա Չոբանյան
