Քաղաքականություն
06.09.2023 | 18:47«Ես անկուսակցական եմ, ինձ հրավիրել են լինելու Երևանի ավագանու կազմում, կարծում եմ` եթե անցնեմ, դա կօգնի պալատին առաջ տանել իր ծրագրերը: Հավանական է, որ շահերի բախումներ կլինեն, բայց ես առաջին հերթին ներկայացնում եմ ճարտարապետական հանրությունը: Աշխատանքն ավագանիում հասարակական բնույթի է, և այն չի խանգարի իմ հիմնական աշխատանքին»,- Factor TV-ի հետ զրույցում նշում է Հայաստանի Ճարտարապետների պալատի նախագահ Ալեքսանդր Բադալյանը` անդրադառնալով Երևանի ավագանու առաջիկա ընտրություններին իր` «Քաղաքացիական պայմանագիր» կուսակցության նախընտրական ցուցակում ներկայացված լինելուն:
Նա շեշտում է, որ մինչև ավագանու անդամի թեկնածու դառնալը՝ պարբերաբար մատնանշել է Երևանի քաղաքապետարանի սխալները։
«Ավագանիում լինելը հնարավորություն կտա որոշ բաներ հուշելու: Հուսով եմ` ավագանին, փողոցներ վերանվանելուց բացի, կզբաղվի այլ կարևոր հարցերով, տեղյակ կլինի, ասենք, ինչ նախագծեր են մայրաքաղաքում հաստատվում, ինչ մեծ կառույցներ են նախատեսվում»,- նշում է նա
Մեր զրուցակցի կարծիքով` հիմա Երևանի համար ճարտարապետական առումով «քոփի-փեսթի» ժամանակներ են. կրկնօրինակում են դասականներին` սխալ ձևով. «Եթե ես լինեմ ավագանիում, առաջնային բարձրացնելու եմ հետևյալ հարցերը` զսպել կառուցապատումը կենտրոնում, վերադարձնել Երևանին հանրային տարածքները, ազատել տրանսպորտային համակարգի կոլապսից: Այսօր Երևանում ինչքան շենք կա, այդքան էլ` ճարտարապետական ոճ, ամեն մեկն ասում է` իմը պետք է ամենալավը լինի, երևա, իմի մասին պետք է խոսեն…»:
Ճարտարապետը նշում է` Երևանը դարձել է բարձրահարկ, ճարտարապետական անորակ լուծումներով քաղաք. «Մենք Երևանում պետք է ունենանք ճարտարապետություն, ոչ թե անշարժ գույք. հիմա ստեղծվում է անշարժ գույք: Հաճախ մերոնք Երևանի շենքերն ավելի ուժեղ են քանդել, քան դա կաներ թշնամու դեսանտը»:
Մանրամասները` տեսանյութում:
Աննա Բաբաջանյան
