BBC-ից հետո Բաքվին հիմա էլ բարկացրել են The New York Times-ի՝ Արցախի վերաբերյալ հրապարակումները

Բաքում շարունակում է իր դժոգոհությունը հայտնել միջազգային լրատվամիջոցների հրապարակումների վերաբերյալ, որոնք լուսաբանում են Արցախում ստեղծված հումանիտար ճգնաժամը։ Այս անգամ հերթն ամերիկյան հայտնի The New York Times պարբերականինն է։ Ադրբեջանի նախագահի օգնական, աշխատակազմի արտաքին քաղաքականության բաժնի ղեկավար Հիքմեթ Հաջիևը New York Times-ին  բաց նամակ է ուղղել՝ իր դժգոհությունները հայտնելով։

Նա նշում է, որ, իբր, «The New York Times-ը բոլորի համար արդար հարթակ լինելու փոխարեն՝ բյուրոկրատական ​​արգելքներ է ստեղծում այլախոհ կարծիքների համար»։

«X սոցիալական ցանցն ավելի ուժեղ այլընտրանք է, ազատ և բաց հարթակ՝ պայքարելու մեր երկրի դեմ խորհրդային ոճով քարոզչություն իրականացնող որոշ արևմտյան լրատվամիջոցների տեղեկատվական մենաշնորհի դեմ։ Կարդալով այդ հոդվածները, այդ թվում՝ NYT-ում, տպավորություն է ստեղծվում, որ բոլորը գրված են նույն պետական ​​ստուդիայի կամ նույն PR ընկերության կողմից, որը ֆինանսավորվում է հայկական լոբբիի և կառավարության կողմից»,- նշել է Հաջիևը։

Ալիևի օգնականին ու ադրբեջանական քարոզչական թիմին, ըստ ամենայնի, բարկացրել է, օրերս NYT-ում Արցախի վերաբերյալ «Մեկ այլ էթնիկ զտում կարող է տեղի ունենալ, և մենք ուշադրություն չենք դարձնում» վերտառությամբ հոդվածը։

Օրերս էլ Ադրբեջանը դժգոհություն էր հայտնել բրիտանական BBC-ի գործունեության կապակցությամբ՝ Արցախում առկա հումանիտար աղետի լուսաբանումների համար։

Ամերիկահայ ռոք երաժիշտ Սերժ Թանկյանն ու Արցախի նախկին պետնախարար Արտակ Բեգլարյանը տեսակապի միջոցով հարցազրույց էին տվել BBC հեռուստաալիքին։ Նրանք հանգամանորեն անդրադարձել էին Լաչինի միջանցքի արգելափակմանն ու Ադրբեջանի ապօրինի գործողությունների արդյունքում Լեռնային Ղարաբաղում ստեղծված հումանիտար ճգնաժամին։

Հավելենք, որ BBC-ն եթեր է տրամադրել նաև Ադրբեջանի ներկայացուցիչներին՝ ադրբեջանցի քաղաքագետ Օրհան Ամաշովին և ադրբեջանական շահերը սպասարկող փաստաբան Ռոդնի Դիքսոնին։

Էմմա Չոբանյան