«Օֆիցիալ դիլերները Հայաստան էլեկտրամոբիլներ չեն բերում»․ փոխնախարար․ ՏԵՍԱՆՅՈՒԹ

«Պետական գույքի կառավարման մասին» օրենքում լրացումներ և փոփոխություններ կատարելու մասին» օրենքի նախագծով լիազորող նորմ է սահմանվում, որը հնարավորություն կտա Կառավարությանը ծառայողական մեքենաների սահմանաքանակների, սահմանաչափերի, քսայուղերին, վառելիքին և այլ չափորոշիչներին ներկայացվող պահանջներ սահմանելու վերաբերյալ: ԱԺ տնտեսական հարցերի մշտական հանձնաժողովի այսօրվա նիստում այս մասին հայտնեց ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը:

Նախագծի ընդունման արդյունքում լիազորող նորմ կսահմանվի «Պետական գույքի կառավարման մասին» օրենքում, որը կլիազորի ՀՀ կառավարությանը հաստատելու պետական գույքի չափորոշիչները մեկ միասնական իրավական ակտով, ինչպես նաև հաշվառելու պետական շարժական գույքը:

Պատգամավոր Արսեն Թորոսյանը փոխնախարարից հետաքրքրվեց, թե ինչպիսին է Կառավարության դիրքորոշումն առանց բենզինի կամ դիզվառելիքի աշխատող մեքենաներ, այսինքն՝ էլեկտրական ավտոմեքենաներ ձեռք բերելու վերաբերյալ:
«Էլեկտրամոբիլների կիրառումը ծառայողական նպատակներով քննարկվել է Կառավարությունում, նույնիսկ որոշակի գործընթաց ենք այդ ուղղությամբ ունեցել: Հարցը քննարկվել է մի քանի անգամ և նույնիսկ որոշակի տեխնիկական բնութագրեր են այդ մասով մշակվել, սակայն հստակ պատասխանել այս պահին, թե, օրինակ, 2024 թվականի հունվարի 1-ից կանցնենք էլեկտրամոբիլների, չեմ կարող հստակ պատասխանել»,- պարզաբանեց Արմեն Սիմոնյանը՝ հավելելով, որ հարցը Կառավարության օրակարգում է:

Մանրամասները՝ տեսանյութում։