Երեխայի նպաստը կբռնագանձվի, եթե նա հայտնվի մանկատանը. նախագիծ․ ՏԵՍԱՆՅՈՒԹ

ԱԺ աշխատանքի և սոցիալական հարցերի մշտական հանձնաժողովի այսօրվա նիստում քննարկվում է Կառավարության հեղինակած ««Պետական նպաստների մասին» օրենքում լրացումներ և փոփոխություններ կատարելու մասին» օրենքի նախագիծը։

Առաջարկվում է ֆունկցիոնալության խոր աստիճանի սահմանափակումով կամ ֆունկցիոնալության ծանր աստիճանի սահմանափակումով անձանց ընտանեկան և սոցիալական նպաստի, ինչպես նաև հրատապ օգնության դիմումի հիման վրա նպաստը վճարել կանխիկ կամ անկանխիկ եղանակով:
Հիմնական զեկուցող, ՀՀ աշխատանքի և սոցիալական հարցերի նախարարի տեղակալ Դավիթ Խաչատրյանի խոսքով՝ նախագծով հստակեցվում են երեխայի ծննդյան միանվագ նպաստ նշանակելու պայմաններն օտարերկրյա քաղաքացի ծնողի համար և այն դեպքում, երբ նոր ծնված երեխայի ծննդի պետական գրանցումն իրականացրել է օտարերկրյա պետության իրավասու մարմինը, օտարերկրյա պետությունում ՀՀ դիվանագիտական ծառայության մարմիններում դիվանագիտական ծառայության պաշտոններ զբաղեցնող անձի, նրա՝ օտարերկրյա պետությունում գտնվող ամուսնուն, Հայաստանի Հանրապետության քաղաքացի հանդիսացող դիվանագիտական ծառայության մարմիններում վարչատեխնիկական կամ սպասարկման անձնակազմում աշխատող անձի երեխայի ծննդյան միանվագ նպաստ նշանակել, եթե երեխայի ծննդի պետական գրանցումն իրականացրել է ՀՀ դիվանագիտական ծառայության մարմինը:

ՀՀ աշխատանքի և սոցիալական հարցերի նախարարի տեղակալը վստահեցրեց, որ հստակեցվում են երեխայի ծննդյան միանվագ նպաստ նշանակելու և խնամքի նպաստի իրավունք տվող պայմանները:

Դավիթ Խաչատրյանը հավելեց, որ նախագծով վերացվում են օրենքի իրավակիրառ պրակտիկայի ընթացքում ի հայտ եկած թերությունները:

Ըստ հիմնական զեկուցողի՝ նախագիծն ընդունվելու դեպքում «Պետական նպաստների մասին» օրենքի 8-րդ հոդվածի 7-րդ մասի դրույթները կհամապատասխանեցվեն «Անձի ֆունկցիոնալության գնահատման մասին» օրենքի 7-րդ հոդվածի 1-ին և 2-րդ մասերին, կհստակեցվեն նաև մինչև երկու տարեկան երեխայի խնամքի նպաստի և երեխայի ծննդյան միանվագ նպաստի նշանակման և վճարման գործընթացները:

Փոխնախարարը ներկայացրեց նաև խնամքի նպաստ նշանակելը մերժելու, ինչպես նաև նպաստ ստանալը դադարեցնելու հիմքերը։

«Այն ծնողը, որը երեխային հանձնել է մանկատուն, տրամաբանորեն սոցիալապես վատ վիճակում է գտնվում, հետևաբար գործող կարգավորմամբ սահմանվող ստացած ծննդյան միանվագ նպաստը հետ բռնագանձելը համարում ենք ոչ նպատակահարմար և հանում ենք այդ դրույթը»,-նշեց Խաչատրյանը։

Փոխնախարարը հիմնավորեց, որ միանվագ նպաստի հետ գանձման պահանջը հանվում է այն դեպքերում, երբ երեխայի կարգաթիվը որոշելու համար հաշվի առնված երեխան կամ նոր ծնված երեխան հայտնվում է մանկատանը՝ հաշվի առնելով, որ երեխայի ծննդյան միանվագ նպաստը պարբերական բնույթ չունի, տրվում է ծնվելու կապացությամբ և դրա իրավունք տվող պայմանները սհամանվում են դիմելու օրվա դրությամբ:

Մանրամասները՝ տեսանյութում։