30.05.2026 | 23:02
ՊՍԺ-ն երկրորդ տարին անընդմեջ դարձավ Չեմպիոնների լիգայի հաղթող․ ՏԵՍԱՆՅՈՒԹ
Կարևոր է տարածաշրջանի բոլոր երկրների ինքնիշխանության և տարածքային ամբողջականության հարգանքը․ Ռաիսին՝ Թուրքիայի ԱԳ նախարարին
Քաղաքականություն
04.09.2023 | 11:42
Իրանի նախագահ Էբրահիմ Ռաիսին նախօրեին Թեհրանում ընդունել է Թուրքիայի ԱԳ նախարար Հաքան Ֆիդանի գլխավորած պատվիրակությանը։ Mehr գործակալության փոխանցմամբ՝ Ռաիսին, անդրադառնալով Իրանի և Թուրքիայի միջև մշակութային և պատմական ընդհանրություններին, հույս է հայտնել, որ Էրդողանի նախագահության նոր ժամկետում երկու երկրների միջև համագործակցության մակարդակն էլ ավելի կբարելավվի։
Մատնանշելով տարածաշրջանում Թուրքիայի անվտանգության մտահոգությունները՝ Իրանի նախագահը ահաբեկչության դեմ պայքարում կարևորել է տարածաշրջանի բոլոր երկրների ազգային ինքնիշխանության և տարածքային ամբողջականության հարգանքը: Նա նաև ընդգծել է տարբեր տարածաշրջաններում, այդ թվում՝ «Կովկասում օտար երկրների ներկայությանը դիմակայելու անհրաժեշտությունը» և նշել տարածաշրջանի ցանկացած երկրների միջև խնդիրները երկխոսության և համագործակցության միջոցով լուծելու կարևորությունը։
Կողմերը քննարկել են նաև երկու երկրների տնտեսական համագործակցությունը։
Ֆիդանն էլ իր հերթին նշել է, որ երկու երկրների միջև փոխգործակցության մակարդակի ընդլայնումը պահանջում է Իրանի և Թուրքիայի ղեկավարների հատուկ ուշադրությունն ու աջակցությունը։ Նա նաև խնդրել է Իրանի աջակցությունը ԲՐԻԿՍ-ին անդամակցության, ինչպես նաև տարածաշրջանային խնդիրների լուծման գործում երկու երկրների երկխոսությանն ու համագործակցությանը։
Հիշեցնենք, որ ավելի վաղ Ֆիդանը բանակցություններ էր անցկացրել Իրանի ԱԳ նախարար Հուսեյն Ամիր Աբդոլահիանի հետ։ Մինչ այդ էլ Ֆիդանն այցով Մոսկվայում էր, որտեղ հանդիպել էր ՌԴ ԱԳՆ ու ՊՆ ղեկավարներ Սերգեյ Լավրովի ու Սերգեյ Շոյգուի հետ։
Էմմա Չոբանյան
