20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
«Ֆրանսիան, հնարավոր է, ռազմական աջակցություն տա ՀՀ-ին». Փարիզի հավանական քայլերը բեռներից հետո. ՏԵՍԱՆՅՈՒԹ
Քաղաքականություն
31.08.2023 | 20:15
Արդեն 24 ժամից ավելի է՝ ֆրանսիական հումանիտար օգնությամբ բեռնված մեքենաները չեն կարողանում մուտք գործել Արցախի Հանրապետություն։ 10 բեռնատարները Երևանից Լաչինի միջանցքի մատույցներ էր ուղեկցել Ֆրանսիայից ժամանած պատվիրակությունը, որը գլխավորում էր Փարիզի քաղաքապետ Անն Իդալգոն։
Կառավարության այսօրվա նիստի ժամանակ Նիկոլ Փաշինյանը, անդրադառնալով հումանիտար բեռների տեղափոխմանը խոչընդոտելուն, ասաց՝ սա նշանակում է, որ Ադրբեջանը Ռուսաստանի Դաշնության խաղաղապահ զորախմբի ներկայությամբ շարունակում է Լեռնային Ղարաբաղի հայությանը սովահարության միջոցով ցեղասպանության ենթարկելու քաղաքականությունը:
Գերմանիայի ԱԳ նախարար Աննալենա Բերբոքը Լեռնային Ղարաբաղում ստեղծված հումանիտար իրավիճակն անվանել է «աղետալի» և կոչ արել Ադրբեջանին ու Ռուսաստանին բացել Լաչինի միջանցքը։
«Մենք շտապ կոչով դիմում ենք Ադրբեջանին և Ռուսաստանին. Լեռնային Ղարաբաղի ժողովուրդը վերջապես պետք է ստանա այն, ինչ անհրաժեշտ է կյանքի համար: Լաչինի միջանցքը պետք է բաց լինի մարդասիրական օգնության համար»,- ասել է Բերբոքը։
Նա հավելել է, որ ԵՄ երկրների ԱԳ նախարարներն այսօր քննարկելու են Արցախում իրավիճակի հարցը։
Քաղաքագետ Հարություն Մկրտչյանի խոսքով՝ Գերմանիայի ԱԳ նախարարի հայտարարությունը ֆրանսիական կողմի գործողության շարունակությունն է։
«Հանրապետություն» կուսակցության նախագահ Արամ Սարգսյանի կարծիքով՝ թեև ֆրանսիական բեռներն ուղեկցում էին Փարիզի քաղաքապետն ու տեղական իշխանությունների այլ ներկայացուցիչներ, սակայն դա չէր կարող լինել առանց Ֆրանսիայի գործադիր իշխանության կանաչ լույսի։ Արամ Սարգսյանը չի բացառում Փարիզի կողմից Հայաստանին նաև ռազմական աջակցության տրամադրումը։
Օգոստոսի 24-ին ֆրանսիական հայտնի պարբերականներից «Ֆիգարո»-ն տեղեկություններ հրապարակեց, որ Ֆրանսիան պատրաստվում է դիմել ՄԱԿ-ի Անվտանգության խորհուրդ՝ Արցախում ստեղծված իրավիճակի հարցով բանաձևի նախագիծ ներկայացնելու համար։ Այս հրապարակումից մեկ օր առաջ էլ Էմանուել Մակրոնը հայտարարել էր՝ Արցախում հումանիտար խնդիրները լուծելու հարցում դիվանագիտության ժամանակն ավարտվել է։
Արամ Սարգսյանը նշում է՝ չնայած այս փուլում Հայաստանի և Ֆրանսիայի շահերը համընկնում են, սակայն Երևանը ևս պետք է գործուն քայլերով ցույց տա իր գործընկերային աջակցությունը՝ հետագայում արդյունքների հասնելու համար։
Նշենք, որ չնայած ՌԴ-ի ոչ դաշնակցային գործելաոճին, այնուհանդերձ, ՀՀ-ն առայժմ որևէ կտրուկ քայլ չի ձեռնարկում արտաքին քաղաքականության վեկտորում փոփոխություններ իրականացնելու համար։
Մանրամասները՝ տեսանյութում։
Նարեկ Կիրակոսյան
