26.06.2026 | 16:22
«Այս իշխանությունն այնքան թքած ունի օրենքի վրա, որ վարժական հավաքները դարձրել է տոտալ ճնշման միջոց»․ Գեղամ Մանուկյան․ ՏԵՍԱՆՅՈՒԹ
Լուկաշենկոն հրաժարվել է Բելառուսից դուրս բերել «Վագների» զինյալներին
Քաղաքականություն
31.08.2023 | 21:42
Բելառուսի նախագահ Ալեքսանդր Լուկաշենկոն հրաժարվել է իր երկրից դուրս բերել ռուսական «Վագներ» ռազմական խմբավորման զինյալներին։ Նա Լեհաստանի և Բալթյան երկրների իշխանությունների համապատասխան կոչերն անվանել է «անհիմն և հիմար»,- գրում է DW-ի ռուսական ծառայությունը։
Բացի այդ, օգոստոսի 31-ին Բելառուսի Անվտանգության խորհրդի նիստում Լուկաշենկոն մեղադրել է ԵՄ հարևան երկրներին պաշտպանական բյուջեները մեծացնելու և «խոշոր ռազմական կազմավորումները» դեպի Բելառուսի հետ սահման տեղափոխելու մեջ։
«Պատասխանը պարզ է՝ ո՛չ Լեհաստանում, ո՛չ Լիտվայում, ո՛չ էլ մերձբալթյան այլ երկրում չպետք է լինի մեկ օտարերկրյա զինծառայող, այնուհետև մենք կարող ենք նաև պնդել այստեղ այլ երկրների զինծառայողների առկայության հարցում»,- Լուկաշենկոյի խոսքերն է մեջբերում BelTA-ն։
Լեհաստանի, Լիտվայի, Լատվիայի և Էստոնիայի ներքին գործերի նախարարներն օգոստոսի 28-ին Վարշավայում կայացած հանդիպման արդյունքներով համատեղ հայտարարությամբ կոչ են արել Մինսկին անհապաղ դուրս բերել Բելառուսում տեղակայված ռուս վարձկաններին։ Նրանք զգուշացրել են, որ սահմանին զենքի կիրառմամբ միջադեպի կամ միգրանտների լայնածավալ հոսքի դեպքում Բելառուսի հետ սահմանի բոլոր անցակետերը կփակվեն։
