07.10.2026 | 23:48
Արթուր Դանիելյանը կալանավորվեց
ԵՄ-ն Ուկրաինային տարեկան 5 մլրդ եվրո կհատկացնի սպառազինության և ուսուցման համար
Քաղաքականություն
31.08.2023 | 15:59
Եվրամիությունը դեռ պետք է հասնի մարտ ամսվա իր նպատակին՝ 12 ամսվա ընթացքում Կիև հասցնել մեկ միլիոն հրետանի: Այդ կապակցությամբ եվրոպական դիվանագիտության ղեկավար Ժոզեպ Բորելը չորեքշաբթի հորդորել է ԵՄ անդամ երկրներին ավելի շատ զինամթերք պատվիրել Ուկրաինայի համար։ Այս մասին նա ասել է լրագրողների հետ զրույցում՝ Իսպանիայի Տոլեդո քաղաքում ԵՄ պաշտպանության նախարարների հանդիպումից հետո, հայտնում է VOA-ն։
Այս տարվա մարտին ԵՄ երկրները համաձայնության են եկել Ուկրաինային 12 ամսվա ընթացքում 1 մլն հրետանային արկ և հրթիռ մատակարարելու ծրագրի շուրջ։ Այս պլանի շրջանակում մատակարարվել է մոտ 224 հազար զինամթերք և 2300 հրթիռ՝ շուրջ 1,1 միլիարդ եվրո ընդհանուր արժեքով, ասել է Բորելը։ Այսպիսով, նախարարների հանդիպման ժամանակ նշվել է, որ ԵՄ-ն նույնիսկ մեկ քառորդով չի մոտեցել նպատակին, իսկ պլանի մեկնարկից անցել է ավելի քան հինգ ամիս։
Եվրամիությունն Ուկրաինայի համար կստեղծի 20 միլիարդ եվրոյի ռազմական օգնության հիմնադրամ, որից 2024-2027 թվականներին Կիևին տարեկան կտրամադրվի 5 միլիարդ եվրո՝ սպառազինության և ուսումնական ծրագրերի համար, հայտնում է Deutsche Welle-ն։
Մինչ այժմ Ուկրաինան 5,6 միլիարդ եվրոյի ռազմական օգնություն է ստացել ԵՄ բյուջեից դուրս գտնվող մեխանիզմից։ Այն փոխհատուցում է ԵՄ երկրներին Ուկրաինային զենք մատակարարելու համար։ ԵՄ օրենսդրությունն արգելում է բյուջետային միջոցների օգտագործումը երրորդ երկրներին ռազմական օգնության համար։
Բորելն առաջարկել է ընդլայնել ուկրաինացի զինվորների ու սպաների ուսուցման ծրագիրը և մինչև տարեվերջ պատրաստել 40 հազար զինվորականի։ Նախկինում առաջադրված նպատակը՝ 2023 թվականին Ուկրաինայի Զինված ուժերի 30 հազար զինվորականի պատրաստումը, կիրականացվի նոյեմբերի վերջին, նշել է նա։
