06.05.2024 | 14:52
Թքել չի կարելի, ԱԺ-ից հնչող քաղաքական խոսքն ազդում է հասարակության խոսույթի որակի վրա. դատախազ․ ՏԵՍԱՆՅՈՒԹ
Արցախի պետնախարարը խորհրդակցություն է հրավիրել նոր ուսումնական տարվա մեկնարկին ընդառաջ
Հասարակություն
30.08.2023 | 13:10
Արցախի Հանրապետության պետական նախարար Գուրգեն Ներսիսյանը օգոստոսի 29-ին աշխատանքային խորհրդակցություն է հրավիրել՝ սեպտեմբերի 1-ին մեկնարկելիք նոր ուսումնական տարվան ընդառաջ:
ԿԳՄՍ նախարար Նորայր Մկրտչյանը ներկայացրել է ուսումնական հաստատությունների ներկայացուցիչների հետ տեղի ունեցած քննարկումների և նախապատրաստական աշխատանքների արդյունքները, ինչպես նաև Արցախի լիակատար պաշարման հետևանքով առաջացած հիմնախնդիրները: Նախարարն ընդգծել է հատկապես գրենական պիտույքների, ուսումնաօժանդակ նյութերի, սննդի, հիգիենայի պարագաների խիստ սղության և տրանսպորտի բացակայության խնդիրները՝ շեշտելով, որ այդ պայմաններում հնարավորինս արվել է սեպտեմբերի 1-ին ուսումնական գործընթացի մեկնարկի նախապատրաստության ուղղությամբ:
Պետական նախարարը շեշտադրել է առկա հիմնախնդիրների ու հնարավորությունների համակողմանի վերլուծության և բոլոր ջանքերի գործադրման անհրաժեշտությունը՝ ուսումնական գործընթացի արդյունավետ կազմակերպման համար: Գուրգեն Ներսիսյանն ընդգծել է, որ հնարավորինս պետք է անել ներկա ծանր պայմաններում լրացուցիչ չափով հարվածի տակ չդնելու երեխաների առողջությունը՝ միաժամանակ չանտեսելով կրթության իրավունքի ապահովման պետության պարտավորությունը:
Նախարարության ներկայացուցիչներից բացի, իրենց դիտարկումներն ու առաջարկներն են ներկայացրել նաև ԱՀ Մարդու իրավունքների պաշտպան Գեղամ Ստեփանյանը, ԱԺ պատգամավորներ Արամ Գրիգորյանը և Էլեոնորա Ավանեսյանը, Ստեփանակերտի քաղաքապետ Դավիթ Սարգսյանը, պաշտոնատար այլ անձինք:
Շահագրգիռ քննարկումից հետո պետական նախարարը մի շարք հանձնարարություններ է տվել լիազոր մարմնին առաջիկա օրերի անելիքների վերաբերյալ՝ միևնույն ժամանակ ընդգծելով իրավիճակի ամենօրյա մշտադիտարկման ու վերլուծության անհրաժեշտությունը՝ ըստ կարիքի համապատասխան որոշումների կայացման նպատակով:
