01.05.2026 | 11:43
Եվրախորհրդարանը ցանկանում է ՀՀ-ի ընտրությունները պաշտպանել ռուսական ազդեցությունից․ DW-ի անդրադարձը
Ադրբեջանական բեռները մնում են Ստեփանակերտի ճանապարհին․ ԼՈՒՍԱՆԿԱՐՆԵՐ
Քաղաքականություն
30.08.2023 | 12:39
Բաքվից Ադրբեջանի Կարմիր մահիկի ընկերության կողմից դեպի ԼՂ ուղևորվող 40 տոննա հումանիտար բեռով երկու մեքենաները, որոնք Աղդամի ճանապարհով նախօրեին հասել էին ռուս խաղաղապահների հենակետի մոտ, դեռևս մնում են այնտեղ, գրում են ադրբեջանական լրատվամիջոցները։
Կարմիր մահիկի ընկերության աշխատակիցները, կամավորները գիշերել են տարածքում տեղադրված վրաններում։ Նախօրեին նրանք նաև բանակցություններ էին անցկացրել ռուս խաղաղապահների հետ։ Ադրբեջանական որոշ աղբյուրներ էլ հայտնում են, որ ռուս խաղաղապահները փշալարեր են տեղադրել ճանապարհին։
Հիշեցնենք, որ Ադրբեջանի Կարմիր մահիկի ընկերության նախագահ, պատգամավոր Նովրուզ Ասլանը հայտարարել էր, թե 40 տոննա ալյուրով երկու մեքենա է ուղարկվել։ «Մենք հուսով ենք, որ այս քայլը դրական կընդունվի Ստեփանակերտում ապրող հայերի և միջազգային հանրության կողմից։ Եթե կարողանանք հետագայում ավելի շատ գնահատում կատարել, ապա կկարողանանք մատակարարել նրանց անհրաժեշտ ապրանքները»,- ասել էր նա։
Հավելենք, որ պաշտոնական Բաքուն ամիսներ շարունակ պնդում էր, թե Արցախում որևէ հումանիտար ճգնաժամ չկա, սակայն հիմա, ըստ երևույթին, որոշել է փոխել քարոզչական գիծը։ Ադրբեջանական Կարմիր մահիկն էլ ամբողջովին վերահսկվում է իշխանությունների կողմից։ Վառ վկայությունն էլ այն է, որ ընկերակցության նախագահ Նովրուզ Ասլանը Միլլի Մեջլիսի պատգամավոր է։
Էմմա Չոբանյան
