Արայիկ Հարությունյանը պատրաստ է հրաժարական տալ․ մանրամասներ գիշերային փակ հանդիպումից․ ՏԵՍԱՆՅՈՒԹ

Արայիկ Հարությունյանը պատրաստ է հրաժարական տալ Արցախի նախագահի պաշտոնից․ այս մասին Ստեփանակերտի Վերածննդի հրապարակում հավաքված բազմության առջև հայտարարել է ինքը՝ Հարությունյանը, խորհրդարանում անցած գիշեր շուրջ վեց ժամ տևած քննարկումից հետո։

Թե ինչ շրջանակների հետ է իր հնարավոր հրաժարականի հարցը քննարկելու, Արայիկ Հարությունյանը չի մանրամասնել։ Հիշեցնենք՝ երեկ Լաչինի միջանցքում տեղադրված ապօրինի անցակետից արցախցի երեք երիտասարդների առևանգումից հետո բազաթիվ քաղաքացիներ հավաքվել էին Ստեփանակերտի հրապարակում և իշխանություններից հստակ գործողություններ էին պահանջում, որից հետո էլ հրավիրվել էր փակ նիստը։ Քննարկմանը մասնակցել են Արցախի իշխանության ներկայացուցիչները, պատգամավորներ, նախկին նախագահներ Բակո Սահակյանը, Արկադի Ղուկասյանը, ՊԲ նախկին հրամանատար Սամվել Բաբայանը, ներկա չի եղել նախկին պետնախարար Ռուբեն Վարդանյանը։

Հանդիպմանը մասնակցած Արցախի ԱԺ պատգամավոր Սեյրան Հայրապետյանը Factor TV-ի հետ զրույցում Հարությունյանի հրաժարականի հավանականությունը մեծ է համարում։

Բակո Սահակյանի նախագահության ժամանակահատվածում Արցախի նախագահի խորհրդականի պաշտոնը զբաղեցրած Տիգրան Աբրահամյանը Factor TV-ի հետ զրույցում նշում է, որ եթե Արայիկ Հարությունյանը հրաժարական տա, ըստ Արցախի Սահմանադրության, խորհրդարանը կարող է նախագահ ընտրել, սակայն Աբրահամյանն այս գործընթացը վտանգավոր է համարում։

Փակ հանդիպմանը քննարկվել է նաև սննդամթերքի մատակարարման խնդիրը․ Արայիկ Հարությունյանը նշել է, որ 6 ժամ տևած քննարկման արդյունքում Աղդամի ճանապարհի օգտագործման շուրջ միասնական որոշման հասնել չեն կարողացել։ Տիգրան Աբրահամյանի տեղեկություններով՝ որոշման չեն կարողացել հասնել, քանի որ առաջարկ է եղել բանակցությունների գնալ ադրբեջանական պայմաններով։

Արդյո՞ք քննարկվել է Աղդամի ճանապարհը տնտեսական նպատակներով օգտագործելու հարցը, ինչպես նաև Եվլախում առանց միջնորդների բանակցությունների գնալու թեման․ Արցախի խորհրդարանի պատգամավոր Սեյրան Հայրապետյանը չհերքեց։

Արցախի նախագահը, անդրադառնալով ադրբեջանցիների կողմից Արցախցի երեք քաղաքացիների առևանգմանը, նշել է, որ հուսադրող լուրեր ունի։

Այսօր առավոտյան նախատեսված էր առևանգված տղաների ծնողների և Արայիկ Հարությունյանի հանդիպումը։ Ամբողջ աշխատանքային օրվա ընթացքում հնարավոր չեղավ Արցախի նախագահականի լրատվական վարչությունից ճշտել՝ հանդիպում եղե՞լ է, թե՞ ոչ։  Առևանգված տղաներից Վահե Հովսեփյանի հայրը Factor TV-ի հետ զրույցում ասաց, որ Արայիկ Հարությունյանի հետ հանդիպումը տեղի է ունեցել և տևել է 20 րոպե։

Վահե Հովսեփյանի հայրը՝ Ջամբուլ Հովսեփյանը Factor TV-ին հայտնեց, որ Արայիկ Հարությունյանն առաջարկել է տղաներին վերադարձնել Ստեփանակերտ, սակայն ինքը համաձայն չէ այդ տարբերակին։ Նա մտավախություն ունի, որ որդուն նորից կառևանգեն, հետևաբար, առաջարկել է նրան վերադարձնել Հայաստան։

Մանրամասները՝ տեսանյութում։

Նարեկ Կիրակոսյան