Դաղստանում արդեն մեկ ամիս է՝ բնակիչները պայքարում են տեղի իշխանությունների դեմ

Հուլիսի վերջից գրեթե ամեն օր Դաղստանի բնակիչները ճանապարհներ են փակում և պիկետներ կազմակերպում կառավարական շենքերի մոտ։ Պատճառն էներգետիկ կոլապսն է։ Վառվում են մաշված էլեկտրասարքավորումները, ամբողջական շրջաններ շոգի պայմաններում մնում են առանց լույսի և ջրի։ Լուսացույցները չեն աշխատում, արևի տակ աղբը փտում է, իսկ խանութներում սնունդը փչանում է, գրում է The Insider-ը:

Մախաչկալայի բնակիչների բողոքներին ի պատասխան՝ շրջանի ղեկավարն Ուկրաինային մեղադրում է իրավիճակի «սրման» համար։ Որոշ շրջանների բնակիչներ գումարներ են հավաքել նոր մալուխներ գնելու համար՝ մաշվածները փոխարինելու նպատակով, սակայն դա չի օգնել լուծել հոսանքազրկման հետ կապված ընդհանուր իրավիճակը։

«Հենց մարդիկ պետք են հատուկ ռազմական օպերացիայի համար, նրանք անմիջապես հիշում են մեզ»,- իր վրդովմունքն է հայտնել Իմամ Շամիլի պողոտայի շենքերից մեկի բնակիչը։

Ըստ հրապարակման՝ սա Մախաչկալայի կենտրոնական փողոցներից է։ Այստեղ հանրահավաք է՝ շուրջ հիսուն ցուցարարներ կանգնած են մայթին։ Անցնող մեքենաների վարորդներն ազդանշաններն են արձակում՝ ի նշան մասնակիցների հետ համերաշխության։

«Երեկոյան գրեթե ժամը 9-ն է, բայց լույս տարածվում է միայն խանութների ցուցափեղկերից և մեքենաների լուսարձակներից։ Ճանապարհի երկայնքով բարձրահարկ շենքերը մթության մեջ են՝ այնպես, որ նույնիսկ հնարավոր չէ տեսնել, թե քանի տուն կա և, ընդհանրապես, ինչ տեսք ունի տարածքը»,- ասվում է հոդվածում:

Դաղստանի ղեկավար Սերգեյ Մելիքովը բողոքի ակցիաներն անվանել է «ուկրաինամետ գործակալների» սադրանք, ինչը մեծապես զայրացրել է տեղի բնակիչներին։ Հանրահավաքի մասնակիցները պնդում են, որ իրենք ուկրաինական կամ ծայրահեղական Telegram-ալիքներ չեն կարդում, փողոց են դուրս գալիս առանց պաստառների ու քաղաքական կարգախոսների։

Ըստ The Insider-ը՝ սա, կարծես, ճիշտ է. Իմամ Շամիլի փողոցը փակածներից շատերը տարեց կանայք են, ոմանք՝ գլուխները ծածկած, ոմանք՝ ոչ: Նրանք պատմում են, որ հավաքվելու մասին որոշել են շենքի ու թաղամասի «չաթերում»։