15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Թուրքիայի ՊՆ ղեկավարի այցից հետո Բաքու է մեկնել ԳՇ նորանշանակ պետը
28.08.2023 | 20:27
Թուրքիայի նորանշանակ ԳՇ պետ Մեթին Գյուրակը մեկնել է Բաքու պաշտպանության նախարար Յաշար Գյուլերի այցից հետո։ Մասնավորապես, ադրբեջանական ԶԼՄ-ների փոխանցմամբ՝ Ադրբեջանի նախագահ Իլհամ Ալիևն այսօր ընդունել է Գյուրակին։
Զրույցի ընթացքում ընդգծվել է, որ «Ադրբեջանի և Թուրքիայի միջև բարեկամական և եղբայրական հարաբերությունները բոլոր ոլորտներում, այդ թվում՝ ռազմական, հաջողությամբ զարգանում են»։ Նշվել է Գյուրակի նշանակումից անմիջապես հետո Ադրբեջան այցի կարևորությունը։
Հավելենք, որ նախօրեին էլ Ալիևն ընդունել էր Բաքվում պաշտոնական այցով գտնվող Թուրքիայի պաշտպանության նախարար Յաշար Գյուլերի պատվիրակությանը։
Բացի այդ՝ Գյուլերը հանդիպել էր նաև Ադրբեջանի ՊՆ ղեկավար Զաքիր Հասանովին։ Հանդիպմանը նախարարները քննարկել էին Ադրբեջանի և Թուրքիայի միջև ռազմական, ռազմատեխնիկական, ռազմակրթական և այլ ոլորտներում համագործակցության զարգացման հեռանկարները, ինչպես նաև տարածաշրջանային անվտանգությունը և փոխադարձ հետաքրքրություն ներկայացնող այլ հարցեր։
Նշենք, որ Մեթին Գյուրակը Թուրքիայի ԶՈւ-ի ԳՇ պետի պաշտոնում նշանակվել էր օգոստոսի սկզբին նախագահ Ռեջեփ Թայիփ Էրդողանի գլխավորությամբ անցկացված Բարձրագույն ռազմական խորհրդի նիստից հետո։ Ի դեպ, նախօրեին էլ Գյուրակը այցով Հյուսիսային Կիպրոսում էր։
