01.05.2026 | 10:36
Ուկրաինական ԱԹՍ-ները կրկին հարձակվել են Տուապսեի վրա. ծովային տերմինալի տարածքում հրդեհ է բռնկվել
Բաքուն բողոքի նոտա է հղել ՌԴ ԱԳՆ-ին «Ադրբեջանի տարածքային ամբողջականության և ինքնիշխանության դեմ ուղղված սադրիչ միջոցառում կազմակերպելու համար»
Քաղաքականություն
28.08.2023 | 11:18
Ռուսաստանում Ադրբեջանի դեսպանատունը ՌԴ ԱԳՆ-ին բողոքի նոտա է հղել՝ կապված օգոստոսի 7-ին Եկատերինբուրգ քաղաքում Թալիշ-Մուղանական Ինքնավար Հանրապետության կազմավորման 30-ամյակին նվիրված միջոցառման հետ, գրում են ադրբեջանական լրատվամիջոցները։
«Ադրբեջանի տարածքային ամբողջականության և ինքնիշխանության դեմ ուղղված այս միջոցառման անցկացման կապակցությամբ դեսպանությունը բողոքի նոտա է հղել ՌԴ ԱԳՆ-ին, իսկ դեսպան Փոլադ Բյուլբյուլօղլուն նամակով դիմել է Սվերդլովի շրջանի նահանգապետ Եվգենի Կույվաշևին, որն արտացոլում է Ադրբեջանի սկզբունքային դիրքորոշումն ու վճռական բողոքը»,-ասվում է հայտարարության մեջ։
Նշվում է, որ ռուսական կողմին ներկայացվել է, որ նման միջոցառումների կազմակերպումը և դրան որպես հյուր Եկատերինբուրգի քաղաքային դումայի նախագահ Իգոր Վոլոդինի մասնակցությունը «քարոզում են անջատողականություն և սկզբունքորեն հակասում Ադրբեջանի և Ռուսաստանի միջև դաշնակցային փոխգործակցության ոգուն, ինչպես նաև վնասում երկկողմ համագործակցությանը»։
«Բաքուն խնդրանք է ներկայացրել անհապաղ միջոցներ ձեռնարկել Իգոր Վոլոդինի և այս միջոցառման կազմակերպիչների դեմ, ինչպես նաև քայլեր ձեռնարկել ապագայում «Ադրբեջանի տարածքային ամբողջականության և ինքնիշխանության դեմ ուղղված նման սադրիչ քայլերը կանխելու համար»,- ասված է հայտարարության մեջ։ Ադրբեջանը բողոքի վերաբերյալ սպասում է ռուսական կողմի պաշտոնական պատասխանին։
