Կրեմլը Պրիգոժինի օդանավի միջադեպի հետ կապված «արևմտյան շահարկումներն» անվանել է «բացարձակ սուտ»

Ռուսաստանի նախագահի մամուլի քարտուղար Դմիտրի Պեսկովը պատասխանել է BBC-ի թղթակցի հարցին, թե ինչպես կարող է Կրեմլը մեկնաբանել արևմտյան երկրների ներկայացուցիչների հայտարարությունները, որոնք պնդում են, որ «Վագներ» մասնավոր ռազմական խմբավորման հիմնադիր Եվգենի Պրիգոժինը սպանվել է Կրեմլի ցուցումով։

«Հիմա, իհարկե, շատ են շահարկումներն այս ավիավթարի և ինքնաթիռի ուղևորների, այդ թվում՝ Եվգենի Պրիգոժինի ողբերգական մահվան հետ կապված։ Իհարկե, Արևմուտքում այս բոլոր շահարկումները ներկայացվում են հայտնի տեսանկյունից։ Այս ամենը բացարձակ սուտ է»,- պատասխանել է Պեսկովը:

Պրիգոժինի մահը դեռևս պաշտոնապես չի հաստատվել։ Ռոսավիացիան հայտնել է, որ նա եղել է օգոստոսի 23-ին վթարի ենթարկված օդանավում։ Արտակարգ իրավիճակների նախարարությունը հաստատել է ինքնաթիռում գտնվող բոլորի մահը։ Մահացածների մարմինների զննությունը չի ավարտվել։

Լրագրողներին առաջարկելով «հիմնվել փաստերի վրա»՝ Պեսկովը հայտարարել է, որ «փաստերը դեռ շատ չեն, դրանք դեռ պետք է պարզվեն քննչական գործողությունների ընթացքում»։

Նախօրեին Պրիգոժինի ենթադրյալ մահվան կապակցությամբ ցավակցական խոսքեր է հնչեցրել Պուտինը, ում դեմ երկու ամիս առաջ ապստամբել էր մասնավոր ռազմականացված խմբավորման հիմնադիրը։ Նրան անվանելով «տաղանդավոր մարդ» և «տաղանդավոր գործարար», ում ճանաչում էր 1990-ականներից, Պուտինը նաև խոսել է Պրիգոժինի «լուրջ» սխալների և նրա դժվար ճակատագրի մասին։ Պուտինը չի հիշատակել ապստամբությունը, սակայն նշել է գործարարի ներդրումը Ուկրաինա ռուսական ներխուժման գործում։

Հետևելով Ռուսաստանի նախագահին՝ նրա մամուլի քարտուղարն առաջարկել է սպասել հետաքննության արդյունքներին։ Ինչ վերաբերում է «Վագների» ապագային, Պեսկովը ոչինչ չի կարողացել ասել և միայն առաջարկել է այս կազմակերպությունն անվանել «Վագների» խումբ, այլ ոչ թե մասնավոր ռազմականացված խմբավորում, որը, իբր, «դե յուրե գոյություն չունի»։

Կմասնակցի՞, արդյոք, Պուտինը Պրիգոժինի հուղարկավորությանը, դեռևս հայտնի չէ, ասել է  Պեսկովին։

«Փաստն այն է, որ մենք ձեզ հետ չգիտենք, թե որքան են տևելու անհրաժեշտ փորձաքննությունները և նախաքննության հետ կապված անհրաժեշտ գործողությունները։ Միակ բանը, որ կարող եմ ասել, այն է, որ նախագահն այժմ բավականին զբաղված աշխատանքային գրաֆիկ ունի»,- ասել է Կրեմլի խոսնակը։