15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Թբիլիսին հայտարարել է Վրաստանի ինքնիշխանության դեմ ոտնձգության հերթական փորձի մասին
Քաղաքականություն
25.08.2023 | 13:06
Վրաստանի ԱԳ նախարարությունը ՌԴ Անվտանգության խորհրդի փոխնախագահ Դմիտրի Մեդվեդևի հայտարարությունն օկուպացված վրացական շրջանների՝ Ռուսաստանի Դաշնությանը հնարավոր միացման մասին համարում է «Վրաստանի ինքնիշխանության և տարածքային ամբողջականության դեմ ոտնձգության հերթական փորձ», գրում է VOA-ն:
Վրաստանի ԱԳՆ-ն հայտարարել է, որ Ռուսաստանն այդպիսով շարունակում է իր օկուպացիոն քաղաքականությունը։ Թբիլիսին կոչ է անում Մոսկվային հարգել միջազգային իրավունքի հիմնարար սկզբունքներն ու նորմերը և կատարել իր պարտավորությունները, որոնք ստանձնել է 2008 թվականի օգոստոսի 12-ին հրադադարի մասին համաձայնագրի ստորագրումից հետո։
Մասնավորապես, այդ պարտավորությունները ենթադրում են ռուսական զորքերի դուրսբերում նախապատերազմական դիրքեր և միջազգային դիտորդների մուտքի ապահովում օկուպացված Աբխազիա և Ցխինվալի տարածաշրջան։
Միաժամանակ, Թբիլիսին հաստատում է օկուպացիոն խնդիրը խաղաղ ճանապարհով լուծելու իր հանձնառությունը։
Հիշեցնենք՝ Մեդվեդևն ավելի վաղ հայտարարել էր, որ չի բացառում Աբխազիայի ու Հարավային Օսիայի միացումը ՌԴ-ին։
