20.06.2026 | 06:31
ԱԱ-2026. Բրազիլացիները հաղթեցին խոշոր հաշվով. ՏԵՍԱՆՅՈՒԹ
Հումանիտար օգնությունն Արցախ հասցնելու մասով տեղաշարժ չկա․ Վարդան Սարգսյան
Հասարակություն
23.08.2023 | 16:10
Առաջին անհրաժեշտության ապրանքներով 21 բեռնատար արդեն շուրջ մեկ ամիս կանգնած է Կոռնիձորի սահմանային հատվածում: Հումանիտար օգնությունը ԼՂ տեղափոխելու հարցում դեռ տեղաշարժ չկա: Այս մասին Factor.am-ի հետ զրույցում ասաց ԼՂ-ում հումանիտար ճգնաժամի կառավարման աշխատանքային խմբի ներկայացուցիչ Վարդան Սարգսյանը։
«Ամեն դեպքում, բեռնատարները դեռ Կոռնիձորում են, աշխատանքները շարունակվում են»,- ընգդծեց Սարգսյանը։
Երեկ ՀՀ է ժամանել ԵԱՀԿ գործող նախագահի անձնական ներկայացուցիչ Անջեյ Կասպրչիկը։ Նա Հայաստան է ժամանել ԵԱՀԿ գործող նախագահի՝ Լաչինի միջանցք այցելելու և առկա իրավիճակի մասին զեկուցելու հանձնարարականի շրջանակներում։ Սարգսյանից հետաքրքրվեցինք՝ արդյոք նախատեսված է եվրոպացի պաշտոնյայի այցը Կոռնիձորի՝ հումանիտար բեռներով լի ավտոշարասյան հատված։
«Ճիշտն ասած, ես տեղեկություն չունեմ»,- ասաց Վարդան Սարգսյանը։
Նշենք, որ բեռնատարներում միացված է սառնարանային ռեժիմը, որպեսզի դրանցում գտնվող դեղորայքը, կաթի փոշին և մանկական կերը չփչանան: Հիշեցնենք, որ ԼՂ-ում հումանիտար ճգնաժամի կառավարման աշխատանքային խումբը հուլիսի 25-ին էր որոշում կայացրել պաշարման մեջ գտնվող Արցախ հումանիտար օգնություն ուղարկել, իսկ ճգնաժամային խմբի ներկայացուցիչ Վարդան Սարգսյանը նշել էր, որ ռուսական խաղաղապահ զորախմբի հետ կապի մեջ են։
Արփի Հակոբյան
