Ապահովագրողները բարձրացրել են Սև ծովում լցանավերի համար հավելավճարները

Ապահովագրական ընկերությունները ծանուցել են Սև ծովի ռուսական նավահանգիստներում գործող նավերի վարձակալողներին «պատերազմական ռիսկերի» պատճսռով հավելավճարների ավելացման մասին, գրում է Reuters-ը՝ վկայակոչելով չորս թրեյդերների:

«Պատերազմական ռիսկերի» հավելավճարներն ավելացվել էին լցանավերի ապահովագրության ընդհանուր արժեքին 2022 թվականին՝ Ուկրաինայում ռուսական ռազմական գործողությունների բռնկումից հետո։ Իրավիճակը Սև ծովում ռուսական և ուկրաինական նավահանգիստների տարածքում սրվել է հուլիսի կեսերին Ռուսաստանի՝ «հացահատիկային գործարքից» դուրս գալու, ինչպես նաև Ուկրաինայի սևծովյան նավահանգիստների վրա հարձակումների համար Ռուսաստանի հասցեին հնչեցված մեղադրանքների ֆոնին։

Առևտրականներն ասում են, որ մինչ այժմ այս իրադարձությունները չեն խաթարել նավթի և նավթամթերքի առաքումը ռուսական սևծովյան նավահանգիստներից, սակայն ռիսկերն աճում են։

«Պատերազմի ռիսկի» հավելավճարները բեռի արժեքի մոտ 1 տոկոսից հասցվել են 1,20-1,25 տոկոսի, ասել են աղբյուրները։ Սա նշանակում է, որ ռուսական նավթը Հնդկաստան ուղարկելու համար յուրաքանչյուր երթը կարժենա 200 հազար դոլարից ավելի Suezmax մեկ տանկերի համար, որը կարող է տեղափոխել 120-200 հազար տոննա: Ապահովագրավճարի ընդհանուր արժեքը կկազմի գրեթե 1 մլն դոլար, հաշվարկել է գործակալությունը։

Արդյունաբերական աղբյուրները նշում են, որ հավելավճարների բարձրացումը վերաբերել է հիմնականում ռուսական նավթ և նավթամթերք տեղափոխող լցանավերին, մինչդեռ Ղազախստանից բեռների համար հավելավճարը մնացել է 1 տոկոսի մակարդակում։