26.06.2026 | 16:22
«Այս իշխանությունն այնքան թքած ունի օրենքի վրա, որ վարժական հավաքները դարձրել է տոտալ ճնշման միջոց»․ Գեղամ Մանուկյան․ ՏԵՍԱՆՅՈՒԹ
«Հիլարի» արևադարձային փոթորիկը Կալիֆորնիայում ջրհեղեղի պատճառ է դարձել
Քաղաքականություն
21.08.2023 | 22:42
Խաղաղ օվկիանոսի «Հիլարի» արևադարձային փոթորիկը հարվածել է ԱՄՆ Կալիֆորնիայի հարավին, ինչի հետևանքով հորդառատ անձրևներ և ջրհեղեղներ են առաջացել: ԱՄՆ Փոթորիկների դեմ պայքարի ազգային կենտրոնի (NHC) տվյալներով՝ օգոստոսի 20-ի ցերեկը փոթորիկը շարժվել է Կալիֆորնիայի հարավով՝ 95 կմ/ժ արագությամբ քամիներով։
NHC-ը նախազգուշացրել է «պատմականորեն առատ» հորդառատ անձրևների հնարավորության մասին, որոնք կարող են նահանգի որոշ հատվածներում կյանքին վտանգ սպառնացող ջրհեղեղներ առաջացնել, գրում է DW-ի ռուսական ծառայությունը։
Փոթորկի պատճառով որոշ գետեր դուրս են եկել ափերից։ Սան Դիեգոյում՝ Մեքսիկայի սահմանի մոտ, ինը մարդ է փրկվել գետից, հայտնել են տեղի հրշեջ վարչությունից։ Վենտուրա շրջանում էլ գետից երկու մարդու են փրկել։
ԱՄՆ-ի այս տարածաշրջանում արևադարձային փոթորիկները չափազանց հազվադեպ են: Որոշ տեղեկությունների համաձայն՝ սա Կալիֆորնիայում 84 տարվա ընթացքում առաջին արևադարձային փոթորիկն է։ ԱՄՆ օդերևութաբանական ծառայությունը նախազգուշացրել է վտանգավոր հեղեղումների և ջրային ավերիչ հոսքերի, ինչպես նաև սողանքների և սելավների հնարավորության մասին։
Ըստ կանխատեսումների՝ այնուհետև փոթորիկը կշարժվի հյուսիս և օգոստոսի 21-ին կանհետանա Նևադայում։ Ավելի վաղ Մեքսիկայում այն խլել էր առնվազն երկու մարդու կյանք:
