14.07.2026 | 13:47
Ալբանիան պատրաստ է Հայաստանի հետ կիսել ԵՄ ինտեգրման իր փորձը
84․6 մլն դրամ՝ առանց մրցույթի․ վարչապետի աշխատակազմի ծախսերը
Տնտեսություն
16.08.2023 | 17:07
ՀՀ վարչապետի աշխատակազմն այս տարվա սկզբից մինչ օգոստոսի 15-ը, 84․6 մլն դրամ է ծախսել՝ առանց մրցույթի՝ մեկ անձից գնումների միջոցով ապրանքների ձեռքբերման համար։
Էլեկտրոնային գնումների ARMEPS համակարգում առկա պայմանագրերի ուսումնասիրությունից պարզ է դառնում, որ այս գումարից 11․2 մլն դրամը հատկացվել է միայն ներկայացուցչական ծախսերի համար։
Վարչապետի աշխատակազմը հանրային սննդի մատուցման ծառայությունների, ճաշկերույթների պայմանագրեր ունի «Երևան հյուրանոց», «Փոյնթ օֆ վյու», «Սալոն ռեստորան», «Սարյան 1 Թրեվլ Քլաբ», «ԷՄ ԲԻ ՋԻ գրուպ», ԱԺ նախկին պատգամավոր Գագիկ Ծառուկյանի հետ փոխկապակցված «Յասաման թիմ», 35․7%-ով Արգամ Աբրահամյանին պատկանող «Պլազա Սիստեմս» ընկերությունների հետ՝ 200 հազար դրամից մինչև 500 հազար դրամ արժեքներով։
Նկատենք, որ ի տարբերություն Ազգային ժողովի, վարչապետի աշխատակազմը ռեստորաններում իր պատվերների մենյուները չի հրապարակում։
Վարչապետի աշխատակազմը «Արցախ Կարպետ» ընկերությունից հուշանվերի համար ձեռք է բերել «Վիշապագորգ»՝ 350 հազար դրամով, 2 գորգ «Արցախ»՝ 610 հազար դրամով, նաև 300 դրամով հուշանվեր է գնել «Ասպար Արմս» ընկերությունից, որը զենքի խանութ է, Կենտրոնական բանկից հուշադրամներ՝ ընդհանուր մոտ 2 մլն դրամ արժեքով, և այլն։ «Վի Իքս Սոֆթ» ընկերությանը տեղեկատվական տեխնոլոգիաների ծրագրային ապահովման սպասարկման ծառայությունների համար վճարվել է 15․5 մլն դրամ, փոստային ծառայությունների համար «Հայփոստին»՝ 26․6 մլն դրամ: Աշխատակազմին սպասարկող 46 ավտոմեքենաների ապահովագրության, վերանորոգման համար ծախսվել է մոտ 6․9 մլն դրամ։
Պետության կարիքների համար կոնյակները վարչապետի աշխատակազմին մատակարարել է Ալեքսան Աղաջանյանին պատկանող «Վինո Վինո» ընկերությունը՝ 11 հատ «Նաիրի» (1 շիշը 30-55 հազար դրամ), 2 հատ «Ախթամար» (յուրաքանչյուրը 10 հազար դրամ), 3 հատ «Դվին կոլեկցիոն» (1 շիշը 24․5 հազար դրամ)։
Ի դեպ, «Վինո Վինո» ընկերությունը վարչապետի աշխատակազմին ապրանքը վաճառել է 50 % զեղչով, այն դեպքում, երբ արտաքին գործերի նախարարությանը՝ ընդամենը 20-30% զեղչով, պաշտպանության նախարարությանը՝ 10 %, իսկ Ազգային ժողովին կամ ֆինանսների նախարարությանը որևէ զեղչ չի տրամադրել։
Գայանե Խաչատրյան
