Խրախճանք՝ ժանտախտի ժամանակ. ինչպես է Փաշինյանի իշխանությունը հաղորդակցվում աշխարհի հետ. ՏԵՍԱՆՅՈՒԹ

44-օրյա պատերազմի երրորդ տարելիցին ընդառաջ Հայաստանի կառավարության նախաձեռնությամբ Երևանում մեծ համերգ է սպասվում։ Նիկոլ Փաշինյանի ղեկավարած կառավարությունն անցած նիստին համաշխարհային հիփ-հոփ աստղ Սնուփ Դոգի համերգը կազմակերպելու համար պետական բյուջեից 2,3 մլրդ դրամ ՝ շուրջ 6 մլն դոլար հատկացրեց չզեկուցվող նախագծով։ Ուշագրավ է, որ չզեկուցվող նախագծերի փաթեթն ընդունվեց միաձայն՝ առանց քննարկումների, իսկ դրան նախորդել էր Նիկոլ Փաշինյանի ծավալուն ելույթն Արցախում ստեղծված աղետալի իրավիճակի վերաբերյալ։

Այժմ հարց է առաջանում, թե Հայաստանն աշխարհի հետ հաղորդակցության ի՞նչ քաղաքականություն է վարում Արցախի՝ ցեղասպանության սպառնալիքի տակ գտնվելուն զուգահեռ։

«Լրագրողներ հանուն ապագայի» ՀԿ նախագահ Սուրեն Դեհերյանի խոսքով՝ եթե աշխարհի մայրաքաղաքներից հետևեն ՀՀ-ի լուրերին, ապա կարող են տպավորություն ստանալ, որ այստեղ որևէ խնդիր չկա։ Սուրեն Դեհերյանը հիշեցնում է 1988 թվականի աղետալի երկրաշարժից հետո Շառլ Ազնավորի նախաձեռնության մասին, որին միացել էին Ֆրանսիայի բոլոր մտավորականները, և կարողացան աշխարհի ուշադրությունը սևեռել Հայաստանի վրա։ Ըստ նրա՝ Հայաստանը պետք է ստեղծված իրավիճակում հաղորդակցության այսօրինակ միջոցներով տեղեկացնի միջազգային լսարանին։

Նիկոլ Փաշինյանի ղեկավարած կառավարության կողմից կազմակերպվող 6 մլն դոլարանոց համերգը, ըստ Սուրեն Դեհերյանի, ընկալելի կլիներ, եթե գաղափարախոսությունը միտված լիներ խաղաղության։

44-օրյա պատերազմի երրորդ տարելիցից չորս օր առաջ նման համերգի կազմակերպումը, երաժիշտ Անդրանիկ սարկավագ Մանուկյանի կարծիքով, նշանակում է՝ բիզնեսն ավելի առաջնային է համարվել քան նվիրյալների հիշատակը։

Չնայած քննադատություններին՝ ՀՀ կառավարությունը, կարծես, չի պատրաստվում զիջումների գնալ ու չեղարկել համերգը։

Մանրամասները՝ տեսանյութում։

Նարեկ Կիրակոսյան