Բյուջեից 2,3 մլրդ դրամ կամ մոտ 6 մլն դոլար՝ Snoop Dogg-ի համերգի կազմակերպման համար

Հայտնի ռեփեր Snoop Dogg-ի համերգի կազմակերպման համար Հայաստանի պետբյուջեից կհատկացվի 2,3 մլրդ դրամ կամ մոտ 6 մլն դոլար: Կառավարությունը պահուստային ֆոնդից գումար հատկացնելու որոշումը կայացրել է այսօր, օգոստոսի 11-ն կայացած նիստի ժամանակ։

Հատկացվող 2,3 մլրդ դրամը կուղղվի Snoop Dogg-ի հոնորարի վճարմանը, արտիստի թիմի տեխնիկական պահանջների, անվտանգության և ապահովագրական ծախսերի, բարձրակարգ տեխնիկական հագեցվածության ապահովմանը և գովազդային միջոցառումների իրականացմանը:

Նշվում է, որ արտիստի ընտրությունը պայմանավորված է ոչ միայն այն հանգամանքով, որ նա ժամանակակից երաժշտության աշխարհում մեծ պահանջարկ է վայելում, այլև, որ նա ներկայացնելու է յուրահատուկ շոու ծրագիր:

«Վերջին տարիներին առավել քան արդիական է դարձել Հայաստանում համաշխարհային աստղերի մասնակցությամբ համերգային լայնամասշտաբ ծրագրեր իրականացնելու հարցը, որը ոչ միայն կարող է նպաստել Հայաստանի ճանաչելիության և վարկանիշի բարձրացմանը, անվտանգ ու ժամանակակից երկրի դիրքավորմանը, մշակութային զբոսաշրջության շրջանակների ընդլայնմանը, այլև կարող է ապահովել երկրի տնտեսական աճը, բիզնես միջավայրի ձևավորման նոր հնարավորություններ ստեղծել»,- ասված է որոշման հիմնավորման մեջ։

Կառավարությունն ակնկալում է, որ շոու ծրագրին ներկա կլինի 20 000 – 25 000 մարդ, այդ թվում՝ 5 000 – 6 000 զբոսաշրջիկ: Համաձայն ՀՀ վիճակագրական կոմիտեի տեղեկատվության՝ մեկ զբոսաշրջիկը միջինը Հայաստանում ծախսում է 800-1000 դոլարին համարժեք դրամ գումար:

«Ծրագրի շահառուներն են Հայաստանի երաժշտասեր և ժամանցասեր հանրությունը, Հայաստանում գտնվող և, միջոցառմանը մասնակցելու նպատակով, Հայաստան ժամանած զբոսաշրջիկները: ՀՀ կառավարության աջակցության շնորհիվ տոմսերը կվաճառվեն բավականին մատչելի գներով, ինչը թույլ կտա ներգրավել հասարակության ավելի լայն շերտեր։ Շահառուների թվում կընդգրկվեն նաև սոցիալապես խոցելի խմբերը»,- նշված է հիմնավորման մեջ։

Snoop Dogg-ի համերգը կկայանա սեպտեմբերի 23-ին «Հրազդան» մարզադաշտում։ Ծրագրի իրականացումն ապահովելու է «Դոպինգ Սփեյս» ընկերությունը։