Ադրբեջանը կմեծացնի Ուկրաինային օգնության փաթեթը

Ուկրաինայում Ադրբեջանի դեսպան Սեյմուր Մարդալիևը հայտարարել է Ուկրաինային օգնության փաթեթի ընդլայնման մասին, որը կներառի մեքենայացված ականազերծման մեքենա։ Այս մասին նա ասել է Ուկրաինայի ներքին գործերի փոխնախարար Բոգդան Դրապյատի հետ հանդիպման ժամանակ, գրում է DW-ի ռուսական ծառայությունը։

«Մենք ցանկանում ենք հիացմունք հայտնել Ռուսաստանի Դաշնության ագրեսիան հետ մղելու ձեր տոկունության և խիզախության համար: Այդ իսկ պատճառով մենք որոշեցինք մեծացնել Ուկրաինային օգնության փաթեթի չափը, ներառյալ՝ հումանիտար ականազերծումը: Մենք արդեն քաղաքական պարտավորություններ ենք ստանձնել Ուկրաինային օգնելու համար»,- ասել է Մարդալիևը։

Նրա խոսքով՝ խոսքը համագործակցության չորս ոլորտների մասին է, որոնցում Ադրբեջանը պատրաստ է օգնել Ուկրաինային.

• բժշկական և հոգեբանական վերականգնում ռուսական ներխուժումից տուժած ուկրաինացի երեխաների համար,
• զինծառայողների վերականգնում,
• աջակցություն էներգետիկայի ոլորտում,
• Ուկրաինայի հետպատերազմյան վերականգնում։

«Մեր համագործակցության համար ընտրել ենք Իրպեն քաղաքը, խոսում ենք քաղաքի ենթակառուցվածքների վերականգնման մասին, նախագծի հայեցակարգը ներառում է ճարտարապետական կենտրոնի, մարզահամալիրի վերականգնում, երեխաների համար արվեստի նոր կենտրոնի կառուցում, հիվանդանոցի բժշկական սարքավորումների ապահովում»,- ասել է դեսպանը։

Ադրբեջանը նաև ներառված է այն երկրների ցանկում, որոնք ականազերծման ոլորտում ուկրաինացի մասնագետների համար դասընթացներ կանցկացնեն։

Հիշեցնենք, որ Ադրբեջանը 7,6 մլն դոլար է հատկացրել Ուկրաինային մարդասիրական օգնության համար։