24.02.2026 | 12:34
Հայ բռնցքամարտիկները հաղթանակով են մեկնարկել հեղինակավոր մրցաշարում
Ադրբեջանն է կանգնած Փարիզի Օլիմպիական խաղերը բոյկոտելու կոչով հակաֆրանսիական տեսանյութի հետևում․ Euronews-ի բացահայտումը
Քաղաքականություն
10.08.2023 | 23:06
Տեսանյութը, որում Փարիզի Օլիմպիական խաղերի գովազդը համադրվում է Ֆրանսիայում ոստիկանական բռնության կադրերի հետ, մեծ տարածում է գտել Թվիթեր սոցիալական հարթակում։ Այն ավարտվում է միջոցառումը բոյկոտելու կոչով՝ Ֆրանսիային մեղադրելով մարդու իրավունքները խախտելու մեջ։ Հոլովակով կիսվել են հայտնի լրագրողներ ու քաղաքական գործիչներ, այդ թվում՝ ֆրանսիացի ծայրահեղ աջ մի պատգամավոր, որը մեղադրում է նախագահ Էմանուել Մակրոնին «արտերկրում Ֆրանսիայի հեղինակությունը ոչնչացնելու մեջ»։
Euronews-ը պարզել է, թե ով է կանգնած այս տեսանյութի և հակաֆրանսիական արշավի հետևում։ Տեսանյութը, կարծես թե, հրապարակվել է New York Insider-ի՝ խոշոր լրատվական կազմակերպության կողմից, հղումը տանում է դեպի newyorkinsider.net կայք: Առաջին հայացքից այն դասական լրատվական պորտալ է՝ սպորտի, քաղաքականության և բիզնեսի մասին բազմաթիվ հոդվածներով: Սակայն Euronews-ի կողմից հայտնաբերված առաջին անհանգստացնող նշանն այն է, որ բոլոր հոդվածները ստորագրված են ոմն «Մայքլի» կողմից, իսկ բովանդակության մեծ մասը պատճենվել է այլ լրատվականներից, ինչպիսիք են New York Times-ը և Huffington Post-ը: Բացի այդ, կայքում բացակայում է «Մեր մասին» էջը։
Երբ փորձել են ստուգել, թե ով է կանգնած դոմենի հետևում, լրատվամիջոցը պարզել է, որ կայքը գրանցված է ԱՄՆ-ում, սակայն ստեղծվել է բոյկոտի տեսանյութի հրապարակումից մեկ ամիս առաջ։ Ուսումնասիրությունը լրատվամիջոցին հասցրել է ադրբեջանցի մի ձեռնարկատիրոջ՝ Օրհան Ռզայի բլոգին, որն ապրանքանիշերի համար թվային բովանդակություն ստեղծող հաղորդակցության գործակալության սեփականատեր է։ Լրատվամիջոցը կապ է հաստատել ադրբեջանցի ձեռնարկատիրոջ հետ, որը, բնականաբար, հերքել է կապը։
«Վիրուսային տեսանյութի հետ կապված որևէ PR արշավի հետ առնչություն չունենք, դրա ստեղծման հետ ո՛չ ես, ո՛չ իմ թիմը կապ չունենք»,- ասել է նա:
Ադրբեջանցի ձեռնարկատերը չի պատասխանել հարցերին, թե ինչու է New York Insider կայքը փորձում ներկայանալ որպես լրատվական միջոց՝ ակնհայտորեն օգտագործելով այլ լրատվամիջոցների բովանդակությունը:
Նշվում է, որ New York Insider-ի կողմից հոլովակը տեղադրելուց մի քանի ժամ առաջ այն սկսել է լայն տարածում գտնել Ադրբեջանում: Նույնիսկ պետական պաշտոնյաներն են ավելի վաղ կիսվել դրանով, ինչպես, օրինակ, Ադրբեջանի նախագահականի ներքո գործող ՀԿ-ներին պետական աջակցության խորհրդի մամուլի ղեկավարը:
Ըստ կազմակերպության կայքի՝ «ՀԿ-ների պետական աջակցության խորհուրդն իրականացնում է հայ-ադրբեջանական, Լեռնային Ղարաբաղի հակամարտության հարցում Ադրբեջանի արդար դիրքորոշման քարոզչությունն օտար երկրներում և միջազգային կազմակերպություններում»: Լրատվամիջոցը նաև դիմել է խորհրդի մամուլի գրասենյակին՝ պարզելու, թե ինչու են աշխատակիցները տարածում տեսանյութը և ում կողմից է այն ստեղծվել, սակայն պատասխան չեն ստացել։
Հավելենք, որ Ադրբեջանը պետական մակարադակով ակտիվորեն զբաղվում է հակաֆրանսիական քարոզչությամբ, որին անմիջականորեն մասնակցում է նաև նախագահ Իլհամ Ալիևը։ Վերոնշյալ Օրհան Ռզան էլ թվիթերյան իր էջում ակտիվորեն հավանում և կիսվում է Ադրբեջանի պետական կառույցների, այդ թվում՝ Ադրբեջանի նախագահի օգնական, ադրբեջանական քարոզչամեքենայի հիմնական պատասխանատու ու համակարգող Հիքմեթ Հաջիևի տարբեր հրապարակումները։
Էմմա Չոբանյան
