Թեհրանն ու Բաքուն քննարկել են Իրանում Ադրբեջանի դեսպանատան վրա հարձակման գործի քննությունը

Թեհրանի և Բաքվի հարաբերությունների կարգավորման ֆոնին շարունակվում են իրանցի պաշտոնյաների այցերն Ադրբեջան։ Մասնավորապես, նախօրեին Ադրբեջանի գլխավոր դատախազ Քամրան Ալիևն ընդունել է Իրանի գլխավոր դատախազի քաղաքական և անվտանգության հարցերով տեղակալ Մեհդի Ամիրի Իսֆահանիի գլխավորած պատվիրակությանը։

Ադրբեջանական կողմի հաղորդմամբ՝ հանդիպման ընթացքում մտքերի փոխանակություն է տեղի ունեցել Ադրբեջանի և Իրանի համապատասխան գերատեսչությունների կողմից այս տարվա հունվարի 27-ին Իրանում Ադրբեջանի դեսպանատան վրա հարձակման հետաքննության քրեական գործերի շուրջ։ Ալիևը նշել է իրանական  կողմից քրեական գործի լիարժեք և բազմակողմանի հետաքննության անհրաժեշտությունը՝ հանցագործության բոլոր մասնակիցներին պատասխանատվության ենթարկելու համար։

Իսֆահանին իր հերթին մանրամասն տեղեկություններ է հաղորդել քրեական գործի քննության ընթացքի մասին՝ ասելով, որ կարճ ժամանակում նախաքննությունը կավարտվի և օրինական որոշում կկայացվի, իսկ մեղավորները կպատժվեն։

Նշվում է, որ իրանական պատվիրակությունը հանդիպումներ է ունենալու դատախազության և քննչական մարմինների ներկայացուցիչների հետ, քննարկելու է քրեական գործի հետաքննության ընթացքն ու այլ հարցեր։

Հիշեցնենք, որ հունվարի 27-ին Իրանում Ադրբեջանի դեսպանատան վրա հարձակման հետևանքով 1 մարդ է զոհվել, 2-ը՝ վիրավորվել։ Հարձակվողը ձերբակալվել է։ Պաշտոնական Բաքուն դեսպանատան վրա իրականացված հարձակումն «ահաբեկչություն» էր որակել։ Միջադեպի վերաբերյալ Թեհրանի քրեական դատախազի պաշտոնակատարն ասել էր, որ զինված անձը Թեհրանում Ադրբեջանի դեսպանատան վրա հարձակվել է անձնական դրդապատճառներով։ Դրանից հետո Բաքուն տարհանել էր Թեհրանում Ադրբեջանի դեսպանատան աշխատակիցներին․ այս պահին դեսպանատան գործունեությունը դադարեցված է։ Այս դեպքից հետո երկու երկու երկրների հարաբերությունները կտրուկ վատթարացել էին։

Էմմա Չոբանյան