Ազգային ժողովը երկրորդ ընթերցմամբ և ամբողջությամբ ընդունեց «Մի շարք վարչական իրավախախտումների համար կիրառված տուգանքների համաներման մասին» օրենքի նախագիծը: Նախագծին կողմ քվեարկեց 68 պատգամավոր, դեմ՝ մեկ, ձեռնպահ՝ երկու:
Դեմ քվեարկող միակ պատգամավորը ՀՀԿ խմբակցության պատգամավոր Միհրան Պողոսյանն էր, որը հարցի քննարկման ընթացքում շարունակաբար պնդեց իր դիրքորոշումը, որ «բարեխիղճ վարորդների նկատմամբ» ոչ ճիշտ և անարդար մոտեցում է ցուցաբերվում:
Միհրան Պողոսյանն առաջարկել էր մինչև 2017-ի դեկտեմբերի 31-ն ընկած ժամանակահատվածում ՃՈ տուգանքները ներելու դեպքում, այն վարորդներին, որոնք բարեխղճորեն վճարումներ են կատարել, գումարները հետ վերադարձնել: Գրեթե նույն տրամաբանությամբ արդարության մասին բարձրաձայնեց նաև նախագծին ձեռնպահ քվեարկած մեկ այլ ՀՀԿ-ական պատգամավոր՝ Հայկ Բաբուխանյանը:
Պատգամավորն առաջարկում էր վաուչերներ բաժանել բարեխիղճ վճարումներ կատարած վարորդներին, որը հնարավորություն կտար հետագայում խախտում անելու պարագայում վճարումներ չկատարել: Ձեռնպահ քվեարկած մյուս պատգամավորը ՀՀԿ-ական Կարինե Աճեմյանն էր:
Մինչ քվեարկությունը հարցի հարակից զեկուցող, ԱԺ փոխնախագահ Արփինե Հովհաննիսյանը, անդրադառնալով այդ առաջարկներին, պարզաբանեց, որ 2012-2017 թվականների ընթացքում ընդհանուր գումարը կազմել է 59,3 մլրդ դրամ, որից միայն 13,7 մլրդ դրամն է, որը որպես ապառք ներառված է համաներման շրջանակներում, ստացվում է, որ 40 մլրդ դրամ պետությունը պետք է վերադարձներ քաղաքացիներին, ինչը ֆինանսական տեսանկյունից կառավարության համար համարվել է ոչ նպատակարմար:
Ինչ վերաբերում է Հայկ Բաբուխանյանի առաջարկին, ապա կառավարությունը դա ևս անընդունելի է համարել՝ հիմնավորելով, որ դա կարծես տուգանքի կանխավճար է: ԱԺ փոխնախագահը նաև հայտնեց, որ Կառավարությունն անընդունելի է համարել նաև «Ծառուկյան» խմբակցության առաջարկը՝ համաներումը տարածել մինչև 2018 թվականի մայիսի 31-ն ընկած ժամանակահատվածի վրա: Արփինե Հովհաննիսյանը, շարունակելով խոսքը, շեշտեց. «Ի՞նչ ենք անում մենք, որպեսզի խրախուսենք իրավահպատակ վարքագիծը, ի՞նչ ենք անում, որպեսզի այն քաղաքացիները, որոնք բարեխղճորեն և նախատեսված ժամկետներում վճարում են տուգանքները, ունենան որոշակի շահագրգռվածություն հետագայում ևս դրանք բարեխղճորեն վճարելու: Ոչ թե՝ հակառակ վարքագիծ ենք դաստիարակում, այդ մարդկանց ասելով, որ կարող եք չվճարել, որոշակի ժամանակահատված սպասել, ինչ-որ ժամանակ կառավարությունը կորոշի ներել ձեր տուգանքները»:
Հովհաննիսյանը նաև ընդգծեց, որ բովանդակային առումով չգիտեն, թե ովքեր են, որ վճարումներ չկատարելու հետ կապված սոցիալական խնդիր ունեն, և ովքեր են նրանք, որոնք վճարելու կարողություն ունենալով, անում են ամեն ինչ, ձևավորում են մեխանիզմներ, որ չվճարեն այդ տուգանքները:
«Օրինակ, վճարողը գույք չունի, բայց իր անունով գրանցված են մի քանի մեքենաներ: Այստեղ հավասարության վերաբերյալ մտահոգությունները ողջամիտ են»,-ասաց Արփինե Հովհաննիսյանը՝ տեղեկացնելով, որ այդուհանդերձ, պետաիրավական և մարդու իրավունքների հարցերի հանձնաժողովը դրական եզրակացություն է տվել օրինագծի վերաբերյալ:
