08.10.2026 | 16:57
ՀՖՖ. Եղիշե Մելիքյանն ունի ՀՀ քաղաքացիություն
Թագուհի Թովմասյանի հայցադիմումը դատարանը մերժել է
Քաղաքականություն
06.08.2023 | 16:46
Վարչական դատարանը վարույթ չի ընդունել ՀՀ ԱԺ պատգամավոր Թագուհի Թովմասյանի հայցադիմումը, որով նա պահանջում էր վերականգնել ԱԺ մարդու իրավունքների պաշտպանության հանձնաժողովի նախագահի պաշտոնում իր լիազորությունները։ Այս մասին տեղեկանում ենք DataԼex դատական տեղեկատվական համակարգից։
Դատարանը` դատավոր Անի Չիլինգարյանի նախագահությամբ, եզրահանգել է, որ ԱԺ մշտական հանձնաժողովի նախագահի պաշտոնը ներառված չէ ո՛չ հանրային ծառայության պաշտոններում, ո՛չ հանրային պաշտոններում, ինչը նշանակում է, որ այն դուրս է «Հանրային ծառայության մասին» ՀՀ օրենքի կարգավորման տիրույթից, այն ընտրովի պաշտոն է, որին կարող է հավակնել հանրային քաղաքական պաշտոնի՝ պատգամավորի կարգավիճակը կրող անձը։
«Տվյալ դեպքում Թագուհի Թովմասյանը, զբաղեցնելով Ազգային ժողովի պատգամավորի հանրային քաղաքական պաշտոնը, ստանձնել է այդ հանձնաժողովի բնականոն գործունեությունն ապահովող կազմակերպական գործառույթները»,- նշված է որոշման մեջ։
Հիշեցնենք, որ հուլիսի 11-ին «Քաղաքացիական պայմանագիր» խմբակցությունն առանց քննարկման և ընդդիմության բացակայության պայմաններում փակ, գաղտնի քվեարկությամբ պաշտոնից հեռացրել էր Մարդու իրավունքների պաշտպանության և հանրային հարցերի խորհրդարանական հանձնաժողովի նախագահ Թագուհի Թովմասյանին։
