Քաղաքականություն
04.08.2023 | 14:02
Թուրքիայի նախագահ Ռեջեփ Թայիփ Էրդողանի գլխավորությամբ նախօրեին անցկացված Բարձրագույն ռազմական խորհրդի նիստի արդյունքներով երկրի ռազմական ղեկավարության կազմում մի շարք փոփոխություններ ու նոր նշանակումներ են տեղի ունեցել։ Էրդողանը ստորագրել է խորհրդի համապատասխան որոշումները։
Մասնավորապես, Թուրքիայի ռազմածովային ուժերի պատմության մեջ առաջին անգամ կին ծովակալ է նշանակվել։ Խորհուրդը Գյոքչեն Ֆիրաթին շնորհել է թուրքական նավատորմի կոնտրադմիրալի կոչում։ 45-ամյա Ֆիրաթը դարձել է Թուրքիայի պատմության մեջ առաջին կին ծովային հրամանատարը 2004 թվականին՝ 1998 թվականին ավարտելով Ծովային պատերազմի քոլեջը:
ԳՇ նոր պետ է նշանակվել Մեթին Գյուրաքը, որը նախկինում 2-րդ բանակային կորպուսի հրամանատարն էր։ Այս պաշտոնը թափուր էր մնացել այն բանից հետո, երբ նախկին ԳՇ պետ Յաշար Գյուլերը նշանակվել էր պաշտպանության նախարար։
Ցամաքային զորքերի հրամանատարի պաշտոնը կզբաղեցնի գեներալ Սելջուկ Բայրաքթարօղլուն, ռազմաօդային ուժերն էլ կգլխավորի գեներալ Զիա Ջեմալ Քադըօղլուն։
Բացի այդ, խորհրդի որոշմամբ՝ 32 գեներալների և ծովակալների կոչումներ են բարձրացվել, 63 գնդապետներ ստացել են գեներալի և ծովակալի կոչումներ։ Թուրքիայի զինված ուժերում գեներալների և ծովակալների թիվը 266-ից կհասնի 286-ի։
Էմմա Չոբանյան
