23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Զայրացող ու կատակող նախկին քաղաքապետը՝ պաշտպանության փոխնախարար․ ՏԵՍԱՆՅՈՒԹ
Քաղաքականություն
03.08.2023 | 20:32
Ամիսներ առաջ Երևանի քաղաքապետի պաշտոնից հեռացած Հրաչյա Սարգսյանն այսօր վարչապետի որոշմամբ նշանակվել է պաշտպանության փոխնախարար։ Հրաչյա Սարգսյանը մինչ այս էլ մի քանի ամիս հասցրել է զբաղեցնել վարչապետի խորհրդականի պաշտոնը։ Թե ինչ խորհուրդներ է նա հասցրել տալ վարչապետին այս ընթացքում, հանրությանն անհայտ մնաց, ինչպես նաև քաղաքապետի պաշտոնից հրաժարականի պատճառները։ Պաշտոնը թողնելիս Սարգսյանը նշել էր, որ իր առաքելությունն ավարտված է։
Հրաչյա Սարգսյանը Երևանի քաղաքապետի պաշտոնը ստանձնել էր 2021-ի դեկտեմբերի 25-ին․ Հայկ Մարությանի հեռացումից 3 օր անց նրա նախկին տեղակալը երդվեց որպես Երևանի նոր քաղաքապետ։ 38-ամյա անկուսակցական Սարգսյանին որպես Երևանի քաղաքապետ հանրությունը բավականաչափ չհասցրեց ճանաչել․ նրա նշանակումից ամիսներ անց՝ 2022 թվականի սեպտեմբերի 23-ին, Տիգրան Ավինյանը, ընտրվելով Երևանի փոխքաղաքապետ, դե ֆակտո սկսեց իրականացնել քաղաքապետի գործառույթները։
Հրաչյա Սարգսյանին որպես քաղաքապետ հանրությունը կհիշի, թերևս, քաղաքապետարանի գործակարգավարական նիստերից, որոնց ժամանակ հաճախ զայրացած հանձնարարականներ էր տալիս ենթականերին։ Բացի զայրանալուց՝ Հրաչյա Սարգսյանը երբեմն էլ կատակում էր։ Անցյալ տարվանից ամեն օր՝ առավոտյան 07։00-ից յուրաքանչյուր ժամը մեկ «Էրեբունի-Երևանը» հնչում է Երևանի 12 վարչական շրջաններում․ որպես քաղաքապետ՝ հանրությունը Հրաչյա Սարգսյանին կհիշի նաև այս որոշմամբ։
Թե ՊՆ-ում ինչ ոլորտներ է համակարգելու մասնագիտությամբ ճարտարագետ, նախկին քաղաքապետ ու վարչապետի նախկին խորհրդական Հրաչյա Սարգսյանը, Factor TV-ին գերատեսչությունից փոխանցեցին՝ դեռ չգիտեն։
Հրաչյա Սարգսյանը 2005-2007 թվականներին ծառայել է ԶՈՒ-ում՝ որպես տանկային դասակի հրամանատար, զորացրվելուց հետո ստացել է լեյտենանտի զինվորական կոչում։
Մանրամասները` տեսանյութում:
Արփի Հակոբյան
