07.10.2026 | 23:48
Արթուր Դանիելյանը կալանավորվեց
Կյանքից հեռացել է Էլչիբեյի դեմ ռազմական ապստամբություն բարձրացրած և Հեյդար Ալիևին իշխանության բերած Ադրբեջանի նախկին վարչապետ Սուրատ Հուսեյնովը
Քաղաքականություն
01.08.2023 | 20:13
Թուրքիայում հիվանդանոցներից մեկում երկարատև հիվանդությունից հետո մահացել է Ադրբեջանի նախկին վարչապետ Սուրատ Հուսեյնովը, հայտնում են ադրբեջանական լրատվամիջոցները։
Ըստ որոշ տեղեկությունների՝ նա կոմայի մեջ էր։ Հուսեյնովի հարազատները հայտնել են, որ վաղը նրա մարմինը տեղափոխելու են Ադրբեջան՝ Գանձակում հուղարկավորելու։
Նշենք, որ Արցախյան առաջին պատերազմի ժամանակ Հուսեյնովը ղեկավարել է 2-րդ բանակային կորպուսը։ 1992 թվականին ստացել է Ադրբեջանի ազգային հերոսի կոչում։
Հուսեյնովը հայտնի է իր բարձրացրած ռազմական ապստամբությամբ։ 1993 թվականի հունիսին ռազմաճակատում Ադրբեջանի բանակի խնդիրների և կառավարության հետ առճակատման ֆոնին՝ նա կազմակերպել էր զինված ապստամբություն Ժողովրդական ճակատի կառավարության և նախագահ Աբուլֆազ Էլչիբեյի դեմ։ Ի վերջո, ապստամբությունն ավարտվեց Էլչիբեյի իշխանության տապալմամբ և Հեյդար Ալիևի իշխանության գալով։ Վերջինն էլ Սուրատ Հուսեյնովին նշանակել է երկրի վարչապետի պաշտոնում։
Մեկ տարի անց, սակայն, Հուսեյնովին մեղադրրել են նոր ապստամբություն նախապատրաստելու համար և հեռացրել զբաղեցրած պաշտոնից։ Հետագայում նա փախել է Ռուսաստան, որտեղ թաքնվել է մինչև 1997 թվականը։ Այնուհետև նրան արտահանձնել են Ադրբեջանին, որտեղ էլ նա դատապարտվել է։ 2004 թվականին Հուսեյնովին ներում է շնորհվել։
Էմմա Չոբանյան
