25.02.2026 | 23:13
Չինաստանն ու Գերմանիան պետք է ամրապնդեն ռազմավարական հաղորդակցությունը. Մերցը հանդիպել է Սի Ցզինպինին
ԱՄՆ ներկայացուցիչները հանդիպել են թալիբների հետ․ քննարկվել են տնտեսությանը, մարդու իրավունքներին ու թմրանյութերին վերաբերող հարցեր
Քաղաքականություն
01.08.2023 | 22:10
ԱՄՆ-ը և Աֆղանստանում իշխող իսլամական արմատական շարժման՝ Թալիբանի ներկայացուցիչները հավաքվել են Կատարի մայրաքաղաք Դոհայում՝ երկօրյա բանակցությունների։ Վաշինգտոնը բաց է թալիբների հետ հետագա տեխնիկական բանակցությունների համար՝ տնտեսական կայունության և թմրամիջոցների ապօրինի շրջանառության դեմ պայքարի համար, այսօր հանդիպման առաջին փուլից հետո հայտարարել են ԱՄՆ Պետքարտուղարությունից, գրում է DW-ի ռուսական ծառայությունը։
Պետքարտուղարությունը բարձր է գնահատել Աֆղանստանում ֆինանսական իրավիճակի բարելավումը, ներառյալ ցածր գնաճը, ինչպես նաև ափիոնի կակաչի աճեցման կրճատումը 2022 թվականի արգելքի շրջանակում։ Ամերիկյան կողմը պատրաստակամություն է հայտնել շարունակել համագործակցությունը թմրանյութերի դեմ պայքարում։
Միևնույն ժամանակ, ԱՄՆ-ը մտահոգություն է հայտնել Աֆղանստանում մարդու իրավունքների վիճակի վատթարացման կապակցությամբ և կրկնել իր կոչը թալիբներին՝ վերացնել աղջիկների՝ միջնակարգ կրթություն ստանալու արգելքը, թույլ տալ կանանց մասնագիտական գործունեություն իրականացնել և ազատ արձակել կալանավորված ամերիկացիներին։
Թալիբներն էլ կոչ են արել չեղարկել իրենց առաջնորդների ճանապարհորդական արգելքներն ու այլ սահմանափակումները և վերադարձնել Աֆղանստանի Կենտրոնական բանկի արտասահմանյան ակտիվները, հայտնել է Քաբուլի կառավարությունը:
