07.10.2026 | 23:48
Արթուր Դանիելյանը կալանավորվեց
Բայրամովը հայտարարել է, թե Բաքուն աջակցում է ՀՀ-Թուրքիա հարաբերությունների կարգավորմանը
Քաղաքականություն
31.07.2023 | 16:58
Ադրբեջանի ԱԳ նախարար Ջեյհուն Բայրամովը Թուրքիայի ԱԳ նախարար Հաքան Ֆիդանի հետ Անկարայում տեղի ունեցած բանակցություններից հետո հրավիրված մամուլի ասուլիսում նշել է, թե Բաքուն աջակցում է Հայաստան-Թուրքիա հարաբերությունների կարգավորմանը։
Նա նաև խոսել է Հայաստան-Ադրբեջան հարաբերությունների կարգավորման գործընթացից։
«2021 թվականի հունվարին Ադրբեջանի նախագահն ասել է, որ մենք պատրաստ ենք շրջել թշնամության էջը։ Ադրբեջանը նաև աջակցում է Թուրքիայի և Հայաստանի միջև հարաբերությունների կարգավորմանը»,- ասել է Բայրամովը։
Նա նշել է, թե Բաքվի և Անկարայի դիրքորոշումներն Արցախյան պատերազմից հետո հիմնված են, իբր, միջազգային նորմերի և սկզբունքների վրա։ Բայրամովը հայտարարել է, թե մեծ նշանակություն ունի «Ադրբեջանի առաջարկած խաղաղության համաձայնագրի ստորագրումը, որը հիմնված է ինքնիշխանության և սահմանների անձեռնմխելիության սկզբունքների վրա»։
Ադրբեջանցի պաշտոնյան նաև Հայաստանին մեղադրել է, իբր, «Արցախի հայերի իրավունքները պաշտպանելու պատրվակով Ադրբեջանի գործերին խառնվելու մեջ»։ Ի դեպ, Բայրամովը որևէ կերպ չի անդրադարձել Բրատիսլավայում Ստեփանակերտի հետ նախատեսված բանակցությունների չեղարկման՝ Բաքվի որոշմանը։
Ադրբեջանի ԱԳ նախարարը խոսել է նաև Ադրբեջան-Թուրքիա-Իսրայել հարթակի մասին, որը, ըստ նրա, կարող է օգտակար լինել հարաբերությունների զարգացման համար ավելի լայն աշխարհագրությունում։ Բայրամովը հայտնել է, որ այդ հարցը քննարկել է Ֆիդանի հետ բանակցություններում։
Էմմա Չոբանյան
