07.10.2026 | 23:48
Արթուր Դանիելյանը կալանավորվեց
Չեխիայում կալանել են ռուս միլիարդատեր Եվտուշենկովի ունեցվածքը
Քաղաքականություն
31.07.2023 | 20:34
Չեխիայի իշխանություններն արգելափակել են ռուս միլիարդատեր Վլադիմիր Եվտուշենկովին պատկանող մի շարք ընկերությունների բանկային հաշիվները, ինչպես նաև կալանքի տակ են վերցրել նրա ակտիվները՝ 100 մլն չեխական կրոնի (4,16 մլն եվրո) չափով։ Այս մասին հայտնում է Չեխական հեռուստատեսությունը (Česká televize), փոխանցում է DW-ի ռուսական ծառայությունը։
Աղբյուրի տվյալներով՝ կալանված ակտիվների թվում են Կառլովի Վարիում գտնվող Savoy Westend հինգաստղանի հյուրանոցը։ Կալանքը սահմանել է Չեխիայի ֆինանսական վերլուծության վարչությունը։ Ներկայում հյուրանոցն աշխատում է սահմանափակ ռեժիմով։ Հյուրանոցի ղեկավարության խոսքով՝ անձնակազմը կանգնած է աշխատանքը կորցնելու վտանգի առջև։ Կառլովի Վարիում Եվտուշենկովի ունեցվածքի ընդհանուր արժեքը գնահատվել է ավելի քան 500 մլն չեխական կրոն (ավելի քան 20,8 մլն եվրո):
Չեխիան հունիսի 28-ին Եվտուշենկովին և նրա որդուն ներառել է պատժամիջոցների ցուցակում։ Գործարարին և նրա որդուն արգելել են մուտք գործել երկիր, ինչպես նաև չեխական կառույցների միջոցով ֆինանսական գործարքներ կատարել, նախատեսվում է սառեցնել ակտիվները։
Հաղորդվում է, որ ընկերությունները, որոնք կապված են Եվտուշենկովի կողմից հիմնադրած «Սիստեմա» ընկերության հետ, սպառազինության համակարգեր են մատակարարում ՌԴ Զինված ուժերին։
2022 թվականի ապրիլին Եվտուշենկովը լքել է «Սիստեմա» ընկերության տնօրենների խորհրդի նախագահի պաշտոնը։
Էմմա Չոբանյան
