Լոնդոնը Պուտինի դեմ ապստամբության պատճառով «Վագներին» չի ճանաչել ահաբեկչական կազմակերպություն

Մեծ Բրիտանիայի՝ ռուսական «Վագներ» մասնավոր ռազմական կազմակերպությունը որպես ահաբեկչական կազմակերպություն սև ցուցակում ներառելու ծրագիրը, հետաձգվել է հունիսին Եվգենի Պրիգոժինի ապստամբության և ՌԴ նախագահ Վլադիմիր Պուտինի՝ ռուսական պետության հետ խմբավորման անմիջական կապերի մասին պնդումների պատճառով։ Այս մասին հայտնում է բրիտանական The Times պարբերականը, որին վկայակոչում է DW-ի ռուսական ծառայությունը։

Լրատվամիջոցը գրում է, որ սև ցուցակում խմբավորման ներառման իրավական հիմքն ի սկզբանե բարդ է եղել, քանի որ խումբը գործել է որպես «զինվորական կազմավորում», սակայն Պրիգոժինի «համաներումից» հետո իրավիճակն է՛լ ավելի է բարդացել։

Ըստ The Times-ի կառավարական աղբյուրների՝ սև ցուցակում ընկերության հայտնվելը հավասարազոր կլինի Ռուսաստանի կառավարական գերատեսչություններից մեկի գործունեության արգելմանը, ինչը կլինի «խիստ անսովոր և հղի մի շարք դիվանագիտական ​​և իրավական բարդություններով»:

Միաժամանակ, նշվում է, որ Մեծ Բրիտանիայի ներքին գործերի նախարար Սուելլա Բրավերմանը և անվտանգության հարցերով պետքարտուղար Թոմ Թուգենդհաթը նախկինի պես մտադիր են միջոց գտնել՝ «Վագներն» ահաբեկչական կազմակերպություն հայտարարելու համար։

Դա արգելելու է քրեական հետապնդման սպառնալիքի տակ գտնվող բրիտանացի քաղաքացիներին լինել խմբավորման անդամ, մասնակցել դրա ժողովներին, կոչ անել աջակցել խմբավորմանը, հրապարակայնորեն ցուցադրել դրա խորհրդանիշները, ինչը «Վագներին» դասելու է այնպիսի ահաբեկչական խմբավորումների շարքին, ինչպիսին են  ԻԼԻՊ-ն ու «Ալ-Քաիդան»։ Բացի այդ, ներդրվելու են նաև ֆինանսական պատժամիջոցներ։

Էմմա Չոբանյան