07.10.2026 | 23:00
Երթևեկության կազմակերպման փոփոխություն՝ Հակոբ Պարոնյան փողոցում
ԱՄՆ սենատոր Բոբ Մենենդեսը շարունակում է վճռականորեն դեմ լինել Թուրքիային F-16-ների վաճառքին
Քաղաքականություն
27.07.2023 | 21:35
ԱՄՆ Սենատի արտաքին հարաբերությունների հանձնաժողովի դեմոկրատ նախագահ Բոբ Մենենդեսը վերահաստատել է իր դիրքորոշումը, որ դեմ է Թուրքիային F-16 կործանիչներ վաճառելուն, գրում է Gercek news-ը։
Մասնավորապես, Reuters-ի հետ զրույցում Մենենդեսը պնդել է, որ իր դիրքորոշումը փոխելու «նոր բան չկա», և ինքն ու հանձնաժողովի իր գործընկերները շարունակում են բարձրաձայնել իրենց մտահոգությունները։
Նշենք, որ Սենատի արտաքին հարաբերությունների և Ներկայացուցիչների պալատի արտաքին հարաբերությունների հանձնաժողովներն իրավասու են «կասեցնել» զենքի խոշոր վաճառքը։
Մենենդեսը երկար ժամանակ է՝ դեմ է Թուրքիային կործանիչները վաճառելուն մի քանի պատճառներով, այդ թվում՝ ՆԱՏՕ-ին Շվեդիայի անդամակցությունը վավերացնելու՝ Անկարայի դժկամության: Բացի այդ, դրան նպաստում են մարդու իրավունքների ոտնահարման և Հունաստանի օդային տարածքով թուրքական թռիչքների վերաբերյալ մտահոգությունները։
2021 թվականի հոկտեմբերին ՆԱՏՕ-ի անդամ Թուրքիան պաշտոնապես դիմել է՝ գնելու 20 միլիարդ դոլար արժողությամբ F-16 կործանիչներ Lockheed ամերիկյան ընկերությունից և իր գործող ռազմական ինքնաթիռների համար արդիականացման համակարգերի գրեթե 80 փաթեթ: ԱՄՆ նախագահ Ջո Բայդենի վարչակազմն իր աջակցությունն է հայտնել վաճառքին։
Էմմա Չոբանյան
