ՌԴ Պետդումայի փոխնախագահը քննադատել է Էրդողանին և մեղադրել խոստումը չկատարելու մեջ

ՌԴ Պետդումայի փոխնախագահ Պյոտր Տոլստոյն իրանական Tasnim գործակալությանը տված հարցազրույցում քննադատել է Թուրքիայի նախագահ Ռեջեփ Թայիփ Էրդողանին, փոխանցում է Gercek news-ը։

Անդրադառնալով Էրդողանի կողմից «Ազովի» գումարտակի անդամներին Ուկրաինային վերադարձնելու հարցին՝ Տոլստոյն ասել է, որ թուրք առաջնորդը չի կատարել իր խոստումները:

«Նախագահ Վլադիմիր Պուտինը միշտ կատարել է իր պարտավորությունները Թուրքիայի հանդեպ, և նա նույնն է ակնկալում Ռուսաստանի գործընկերներից: Ցավոք, Էրդողանը չկատարեց իր պարտավորությունները: Ըստ պայմանավորվածությունների և փոխըմբռնումների՝ Թուրքիայում գտնվող ուժերը պետք է այնտեղ մնային մինչև հակամարտության լուծումը»,- ասել է Տոլստոյը։

Նա մեկնաբանել է նաև Թուրքիայի դիրքորոշումը Ուկրաինայի՝ ՆԱՏՕ-ին անդամակցելու հարցում։ Տոլստոյը հասկացրել է, որ Ռուսաստանը բարենպաստ չի դիտարկի իրադարձությունների նման զարգացումը։ Նա նույնիսկ առաջարկել է, որ Ուկրաինան կարող է անդամակցել ՆԱՏՕ-ին՝ առանց Թուրքիայի հավանության անհրաժեշտության:

«Զելենսկին կարող է անդամակցել ՆԱՏՕ-ին առանց Թուրքիայի»,- հայտարարել է Տոլստոյը՝ ակնարկելով, որ այդ հարցում Թուրքիայի կարծիքը կարող է էական ազդեցություն չունենալ։

Բացի այդ, նա Էրդողանին անվանել է «շահախնդիր» և քննադատել Թուրքիայի մոտեցումը միջազգային հարաբերությունների նկատմամբ՝ նշելով, թե Անկարան մշտապես առաջնահերթություն է տալիս իր շահերին՝ դրանք ամեն ինչից վեր դասելով։

Էմմա Չոբանյան