03.10.2026 | 17:29
ԱՄԷ-ի գլխավոր դատախազ․ Flydubai-ի երկրորդ օդաչուն ահաբեկչություն էր ծրագրում
Ուկրաինայի հաղթանակի կանխատեսում մինչև 2024-ի ամառ․ Կիևի և Մոսկվայի բախումը սրվում է. ՏԵՍԱՆՅՈՒԹ
Քաղաքականություն
24.07.2023 | 19:30
Ռուս-ուկրաինական հակամարտությունը գնալով սրվում է։ Արդեն մեկ ամսից ավելի է, ինչ ուկրաինական ուժերը սկսել են իրենց հակագրոհը երկրի հարավում ու արևելքում։ Ուկրաինայի ՊՆ-ի տվյալներով հակահարձակման ողջ ընթացքում ազատագրել է ավելի քան 192 քառ. կմ տարածք։ Իսկ ԱՄՆ պետքարտուղար Էնթոնի Բլինքենը հայտարարել է, որ թեև Ուկրաինան հետ է վերցրել ներխուժման ժամանակ Ռուսաստանի կողմից գրավված տարածքների կեսը, Կիևին «շատ ծանր պայքար» է սպասվում։
Հուլիսի 17-ին լրացավ գործարքի ժամկետը, որով հացահատիկ էր արտահանվում ուկրաինական սևծովյան նավահանգիստներից, այդ թվում՝ Օդեսայից, և Ռուսաստանը դրան չէր խանգարում։ Ռուսաստանի իշխանությունները, սակայն, հայտարարեցին, որ գործարքի շրջանակներում երկրի հետ կապված պայմանավորվածությունների մի մասը չի կատարվել և չերկարաձգեցին համաձայնագիրը։ Դրան անմիջապես հաջորդեցին տեղեկությունները Ղրիմի կամրջին հասցված հարվածների մասին։ Իսկ արդեն հուլիսի 18-ից Ռուսաստանը սկսեց հարվածներ հասցնել Ուկրաինայի հարավում, այդ թվում՝ Օդեսայում, նավահանգստային ենթակառուցվածքի օբյեկտներին։ Ի պատասխան այս հարվածների Ուկրաինայի նախագահ Վլադիմիր Զելենսկին խոստացավ «պատասխան»։
Այսօր առավոտյան ՌԴ իշխանությունները հայտնեցին Մոսկվայում ու Ղրիմում ԱԹՍ-ների հարվածների մասին։
Մոսկվայի քաղաքապետ Սերգեյ Սոբյանինը հաղորդեց, որ երկուշաբթի առավոտյան քաղաքը հարձակման է ենթարկվել անօդաչու թռչող սարքերի կողմից։ Դրանցից մեկի բեկորները հայտնաբերվել են Ռուսաստանի զինված ուժերի գլխավոր շտաբին ենթակա Պաշտպանության ազգային կառավարման կենտրոնից 200 մետր հեռավորության վրա։ Երկրորդ անօդաչուն բախվել է Լիխաչովի փողոցում գտնվող բիզնես կենտրոնի վերին հարկերին։ Այսօր նաև հայտնի է դարձել Ղրիմում սպառազինության պահեստի պայթեցման մասին։
Ուկրաինայի պաշտպանության նախարար Ալեքսեյ Ռեզնիկովը CNN-ին տված հարցազրույցում կանխատեսում է արել, որ մինչև ՆԱՏՕ-ի հաջորդ գագաթնաժողովը ռուս-ուկրաինական պատերազմը կավարտվի Կիևի հաղթանակով, որից հետո երկիրը կհրավիրվի դաշինք։
Մանրամասները՝ տեսանյութում։
