ԱՄՆ-ն և Ավստրալիան լայնածավալ զորավարժություններ են սկսում

ԱՄՆ-ը և Ավստրալիան հուլիսի 21-ին սկսել են ավելի քան 30 հազար մասնակիցների մասնակցությամբ «Talisman Saber» համատեղ զորավարժությունները, որոնց նպատակն է զսպել Չինաստանի ռազմական ակտիվությունը Հնդկախաղաղօվկիանոսյան տարածաշրջանում, հայտնում է Reuters-ը։

Նշվում է, որ 2005 թվականից ի վեր Ավստրալիայում երկու տարին մեկ անցկացվող համատեղ զորավարժությունները կլինեն ամենամեծը մասնակիցների թվով և ներգրավված զինտեխնիկայով։

Զորավարժությունները կանցկացվեն երկու շաբաթ Ավստրալիայի տարբեր վայրերում և կներառեն դաշնակիցների ցամաքային ու օդային մարտական վարժանքները, ինչպես նաև ծովային դեսանտների վայրէջքն ու հակազդելու փորձերը՝ պայմանական թշնամու կողմից իրենց ծովային հետևակայիններին Ավստրալիայի ափ իջեցնելու դեպքում:

Սիդնեյում զորավարժությունների բացման արարողության ժամանակ ԱՄՆ ռազմածովային ուժերի քարտուղար Կառլոս Դել Տորոն ասել է, որ ամենակարևոր ուղերձը, որ Չինաստանը կարող է ստանալ այս զորավարժություններից, այն է, որ դաշնակիցներն ու գործընկերները շատ կապված են երկու երկրների միջև գոյություն ունեցող հիմնական արժեքների հետ։

Բացի ամերիկացիներից ու ավստրալացիներից՝ զորավարժություններին կմասնակցեն ևս 11 գործընկեր երկրների ներկայացուցիչներ։ Գերմանիան այս տարի առաջին անգամ կմիանա զորավարժություններին 210 պարաշյուտիստներից և ծովային հետևակներից կազմված ուժերով, քանի որ ձգտում է ուժեղացնել իր ներկայությունը Հնդկախաղաղօվկիանոսյան տարածաշրջանում:

Զորավարժություններին որպես դիտորդ կմիանան նաև ներկայացուցիչներ Հնդկաստանից, Ֆիլիպիններից, Սինգապուրից և Թաիլանդից։