13.12.2024 | 23:31
Գերմանիան հավանություն է տվել 2006թ․ ի վեր զենքի ամենամեծ արտահանմանը Թուրքիա
Ալիևը հայտարարել է, որ ՌԴ-ի հետ հարաբերությունները նոր ռազմավարական դաշնակցային մակարդակի են հասել
Քաղաքականություն
21.07.2023 | 21:43
Ադրբեջանի նախագահ Իլհամ Ալիևը հայկական գրավյալ Շուշիում կազմակերպված մեդիաֆորումի ժամանակ անդրադարձել է նաև ՌԴ-ի հետ Բաքվի դաշնակցային հարաբերություններին։ Ի դեպ, հարցն Ալիևին ուղղել է ռուսական պետական ՏԱՍՍ գործակալության գլխավոր տնօրենի տեղակալ Միխայիլ Գուսմանը, որն առաջին անգամ չէ, որ ադրբեջանական կողմի հրավերով Շուշիում է։
Ալիևը հայտարարել է, որ Ադրբեջանն ու Ռուսաստանը մեծ հաջողությամբ ամրապնդում են հարաբերությունները երկու երկրների միջև դաշնակցային համագործակցության մասին հռչակագրի ստորագրումից հետո։
«Ինչ վերաբերում է այն շրջանին, որը մենք անցնում ենք հռչակագրի ստորագրումից հետո, ապա դա բոլորովին նոր է աշխարհի, մեր տարածաշրջանի, այդ թվում՝ Ռուսաստանի և մեզ համար։ Բայց չնայած աշխարհաքաղաքական իրավիճակի լուրջ փոփոխություններին՝ հռչակագրի ստորագրումից հետո Ռուսաստանի և Ադրբեջանի հարաբերությունների զարգացումը բավականին հաջող է ընթանում։ Կարծում եմ, որ մեր հարաբերությունների ապագան կլինի նույնքան դրական և հաջող, ինչպես նախորդ տարիներին»,- ասել է Ադրբեջանի նախագահը։
Նա նշել է, որ ռուս-ադրբեջանական հարաբերությունները հասել են ռազմավարական նոր փուլի։ Ալիևը նաև ասել է, որ ռուսական և ադրբեջանական լրատվամիջոցների հրապարակումները որևէ ազդեցություն չունեն Բաքվի և Մոսկվայի քաղաքականության վրա, դաշնակցային համագործակցության մասին հռչակագրի կետերը կատարվում են։
«Փոքր կոպտությունները, որոնք մենք տեսնում ենք ռուսական լրատվամիջոցներում՝ Ադրբեջանի, իսկ ադրբեջանական ԶԼՄ-ներում՝ Ռուսաստանի նկատմամբ, ազդեցություն չունեն Բաքվի և Մոսկվայի քաղաքականության վրա։ Մենք դա հստակ գիտենք, սա տուրք է այն ժամանակին, երբ լրատվամիջոցների ներկայացուցիչները լիովին ազատ են իրենց գնահատականներում»,- հավելել է Ալիևը։
Էմմա Չոբանյան
