Քաղաքականություն
21.07.2023 | 19:38
ԵՄ ԱԳ նախարարները համաձայնել են, որ միությունը պետք է վերսկսի համագործակցությունը Թուրքիայի հետ, սակայն որոշ պայմաններ են առաջ քաշել՝ չաջակցելով անդամության հայտը վերակենդանացնելու՝ Անկարայի կոչերին, գրում է Reuters-ը։
Թուրքիան ԵՄ անդամի պաշտոնական թեկնածու է արդեն 24 տարի, սակայն անդամակցության բանակցությունները կանգ են առել 2016 թվականից՝ միության կողմից մարդու իրավունքների խախտումների և օրենքի գերակայության նկատմամբ հարգանքի մտահոգությունների պատճառով:
Հուլիսի 10-ին էլ Թուրքիայի նախագահ Ռեջեփ Թայիփ Էրդողանն անսպասելի կոչ էր արել վերսկսել Անկարայի անդամակցության բանակցությունները՝ այն կապելով Թուրքիայի կողմից ՆԱՏՕ-ին Շվեդիայի միանալու հայտի հաստատման հետ:
«Մենք քննարկել ենք, թե ինչպես կարելի է կրկին համագործակցել Թուրքիայի հետ։ Մենք համոզված ենք, որ Թուրքիայի և Եվրամիության միջև ավելի ամուր հարաբերություններ զարգացնելու փոխադարձ շահ կա»,- ասել է ԵՄ գլխավոր դիվանագետ Ժոզեպ Բորելը միության ԱԳ նախարարների հանդիպումից հետո։
Նա, սակայն, հավելել է՝ ԵՄ-ն ցանկանում է, որ Թուրքիան ևս շարժ ցույց տա, հատկապես՝ միության անդամ Կիպրոսի հարցում, որի հյուսիսային հատվածն օկուպացրել է 1974 թվականին։
«Կիպրոսի հարցի լուծումը ՄԱԿ-ի բանաձևերին համապատասխան առանցքային կլինի Թուրքիայի հետ հարաբերությունների վերականգնման համար։ Բացի այդ՝ կարևոր է հարգել Մարդու իրավունքների եվրոպական կոնվենցիայով սահմանված հիմնարար ազատություններն ու արժեքները, որի մաս է կազմում Անկարան»,- ասել է Բորելը։
Ավելի վաղ լրատվամիջոցին թուրք բարձրաստիճան մի պաշտոնյա ասել էր, որ Անկարան ակնկալում է ԵՄ-ից կոնկրետ առաջընթաց այնպիսի հարցերի շուրջ, ինչպիսիք են առանց վիզայի ճամփորդությունը, ինչպես նաև ԵՄ անդամակցության գործընթացի որոշ գլուխների փակումը։ Բացի այդ, նա նշել է, որ Արևմուտքը պետք է Թուրքիային աջակցի ֆինանսական կարիքներում։
Էմմա Չոբանյան
