Քաղաքականություն
17.07.2023 | 20:00Հայաստանում գտնվող դեսպաններից ոմանք նախընտրում են իրենց ելույթների բացման խոսքը սկսել հայերենով, ոմանք արտասանում կամ երգում են հայերեն։ Դեսպանատների կողմից հրապարակվող տեսաուղերձներում կամ տարբեր միջոցառումների ժամանակ Հայաստանում հավատարմագրված դիվանագետները նախընտրում են հասարակությանը ներկայանալ հայերեն խոսքով։
Նիդերլանդների դեսպան Նիկոլաս Սխերմերսը գրեթե բոլոր ելույթները սկսում է հայերենով, իսկ վերջերս նաև արտասանել է Հովհաննես Թումանյանի «Հայրենիքիս հետ» բանաստեղծությունը։
Իսկ Մասանորի Ֆուկուշիման` Հայաստանում Ճապոնիայի դեսպանը, սիրում է հայկական երգեր, վերջերս էլ Կապանի դպրոցներից մեկում կատարեց Ռոբերտ Ամիրխանյանի «Հայի աչքեր» երգը։
Գարնանը Ազգային ժողովի բակում կազմակերպված ճապոնական մշակույթին նվիրված տոներից մեկի շրջանակում դեսպանը գրեթե չորս րոպե ելույթ ունեցավ հայերեն։
Factor TV-ն Հայաստանում Նիդերլանդների Թագավորության դեսպան Նիկոլաս Սխերմերսից հետաքրքրվել է՝ ինչպե՞ս է նա սովորել հայերեն, և որքանո՞վ է կարևոր դեսպանների համար սովորել այն պետության լեզուն, որտեղ աշխատում են։
«Ինձ համար դժվար է հաղորդակցվել հայերենով, բայց լավ է ու հեշտ է սկսել իմ խոսքը հայերենով, որովհետև ես ժամանակ ունեմ նախապատրաստվելու։ Ազնիվ կլինեմ, ես սկսել եմ սովորել հայերեն որպես հոբբի, որպես դժվար իրավիճակներից ցրվելու տարբերակ՝ ինչպես քովիդը և պատերազմը, երբ ես ժամանեցի»,- նշեց դիվանագետը։
Դեսպանը սկսել է սովորել, ինչպես ինքն է ասում, պաշտոնական լեզուն, իսկ առօրյա խոսակցական բառերն առավել դժվար է արտաբերել և հիշել։
Նիկոլաս Սխերմերսը խորհուրդ է տալիս հայերեն սովորել բոլոր այն դեսպաններին, ովքեր հնարավորության ունեն դրա համար ժամանակ տրամադրել, իսկ հայերին խնդրում է, որ դադարեն ասել, թե հայերենը դժվար է սովորել։
Մանրամասները՝ տեսանյութում։
Անի Թամրազյան
