17.03.2026 | 23:25
ԻՀՊԿ-ն հաստատել է «Բասիջ» ուժերի հրամանատար Ղոլամռեզա Սուլեյմանիի մահը
Փաստաբանները հանդիպել են նախարար Վահե Ղազարյանի և ՆԳՆ ոստիկանության պետի հետ․ ՏԵՍԱՆՅՈՒԹ
Հասարակություն
11.07.2023 | 14:04
Բողոքի ակցիա իրականացնող փաստաբանների ներկայացուցիչները հանդիպել են Ներքին գործերի նախարար Վահե Ղազարյանի հետ։
«Ոստիկանության պետ Արամ Հովհաննիսյանն էլ էր մասնակցում հանդիպմանը։ Փաստաբանների պալատի նախագահ Սիմոն Բաբայանը ներկայացրեց բոլոր խնդիրները, եղավ վերլուծություն։ Որոշվեց, որ ՆԳ նախարարության հետ կստորագրվի համապատասխան հուշագիր, ստեղծվում է ոստիկաններից և փաստաբաններից կազմված հանձնախումբ, որը նմանատիպ դեպքերում օպերատիվ արձագանք կտա»,- հանդիպումից մանրամասներ ներկայացրեց փաստաբան Արա Զոհրաբյանը։
Զոհրաբյանը հավելեց, որ ոստիկանությունում հավաստիացրել են, թե մեղավորներն օբյեկտիվ պատասխանատվություն կկրեն։
«Ասացին, որ այսուհետ ամեն ինչ կանեն, որ փաստաբաննների հետ նման դեպքեր չկրկնվեն։ Տարբեր հավաստիացումներ եղան։ Որոշվեց, որ հանձնախմբում կլինեն 3 փաստաբան և 3 ոստիկան»,- նշեց Արա Զոհրաբյանը՝ հայտարարելով, թե համատեղ հայտարարություն կներկայացվի։
Նշենք, որ փաստաբանները եռօրյա գործադուլ են սկսել՝ հրաժարվելով Հայաստանի պետական մարմիններում (այդ թվում՝ դատարաններում, նախաքննության մարմիններում) պաշտպանություն կամ ներկայացուցչություն իրականացնելուց։
Նրանք բողոքում են ոստիկանության բաժնում վերջին ամիսների ընթացքում տեղի ունեցած բռնության դեպքերի դեմ։
Փաստաբանների ակցիաները մեկնարկեցին հունիսի 7-ին տեղի ունեցած դեպքից հետո, երբ ոստիկանները բռնություն էին կիրառել և ձերբակալել փաստաբան Կարեն Ալավերդյանին` ամբաստանյալին ծեծից պաշտպանելու փորձի ժամանակ։ Սա փաստաբանների նկատմամբ բռնություն կիրառելու առաջին դեպքը չէ։ Նախորդ անգամ էլ ոստիկանության Էրեբունու բաժնում առերես հարցաքննության ժամանակ փաստաբանական պալատի երկու փաստաբաններին ոստիկանները նախ հայհոյել, այնուհետև ծեծի էին ենթարկել։
Մանրամասները՝ տեսանյութում։
