Իրավապահ մարմինները ցուցարարներին չեն հեռացնում ինչն անհասկանալի է․ Տեր Ասողիկ քահանա Կարապետյան․ ՏԵՍԱՆՅՈՒԹ

Մայր Աթոռը Ամենայն Հայոց կաթողիկոսի դեմ բողոքի ակցիա նախաձեռնած քաղաքացիների կողմից դիվանատան տարածք ներխուժելու առաջին իսկ օրվանից դիմել է ոստիկանությանը, որը, սակայն, ակցիայի մասնակիցներին չի հեռացրել այնտեղից:
Այս մասին, այսօր լրագրողների հետ զրույցում ասաց Մայր Աթոռի ձեռագրատան, արխիվի և թանգարանների տնօրեն Տեր Ասողիկ քահանա Կարապետյանը՝ հավելելով, թե դա անհասկանալի է։ 
Նա կարծիք հայտնեց, որ «Նոր Հայաստան, նոր հայրապետ» նախաձեռնության անդամների մեղադրանքներն ընդամենը  չարախոսություն  և   բամբասանք են։  «Հերյուրանքները  տարիներ շարունակ շրջանառվում են այն մարդկանց կողմից, որոնք դեմ են Վեհափառ հայրապետին, որոնք արդեն նախանձից ու ատելությունից կուրացել են եւ անձնական շահից բացի, այլ բան չեն կարողանում տեսնել»,-ասաց նա։

Անդրադառնալով Գեղարդի հետ կապված վերջին օրերի աղմուկին, քահանան վստահեցրեց․«Հայոց եկեղեցին ունի մեկ՝ բուն Գեղարդ եւ 1980-ականներին պատրաստված գեղարդի կրկնօրինակը: Դա արվել է այն նպատակով, որ բուն Գեղարդը հափշտակությունից պաշտպանվի: Եվ այն եւս  օրհնվել է եւ սրբացվել»: Տեր Ասողիկի ներկայացմամբ՝  աշխարհում հայտնի է հինգ գեղարդ, բայց   Մայր Աթոռում պահվողն է բնօրինակը։ Լրագրողի հարցին, թե ինչու միաժամանակ  չեն  ցուցադրվում եւ բնօրինակ Գեղարդը, եւ կրկնօրինակը, որպեսզի կասկածները փարատվեն, քահանան արձագանքեց․«Կրկնօրինակի նկարները կան համացանցում: Ցանկացողը կարող է գալ Մայր Աթոռ եւ տեսնել բուն Գեղարդն ու կրկնօրինակը»:  Նա նաեւ հավելեց, որ մասունքի մի մասի նվիրաբերումը նորմալ կարգ է․ «Նույն սկզբունքով Քրիստոսի խաչափայտն  է մասնատվել եւ տարածվել ողջ  քրիստոնեական աշխարհում»,- նշեց քահանան: Հիշեցնենք, որ օրերս մեծ աղմուկ բարձրացավ այն  բանից հետո, երբ  հայտնի դարձավ, որ աստվածամուխ սուրբ Գեղարդից մի փոքրիկ բեկոր 2004թ. նվիրաբերվել է ռուսաց եկեղեցուն: 

Մանրամասները՝ տեսանյութում։